Lo Forum Euroregional Patrimòni e Creacion, definit coma una granda fèsta de las culturas vivas, prepausa tres jornadas e seradas de concèrts, teatre, conferéncias, taulas redondas, mòstras, iniciacions als espòrts tradicionals, passacarrièra dels animals totemics, talhièrs e balètis... Un quarantenat de rendètz-vos gratuits prepausats per totes los atges e totes los publics.

Castèlnòu d’Arri vendrà, de divendres a dimenge que venon, l’epicentre cultural d’Occitània e dels Païses Catalans. La vila lauraguesa aculhís lo Forum Euroregional Patrimòni e Creacion, un eveniment festiu, participatiu e inedit que prepausa un trentenat d’espectacles pendent tres jorns e tres seradas, mai d’un centenat d’artistas, un ochantenat d’intervenents dont de cercaires, d’expèrts, d’artistas e de companhiás. En mai d’aquò i seràn persentas mai d’un cinquantenat d’estructuras associativas. La còla de Jornalet i serem.
 
Pendent tres jorns, Castèlnòu d’Arri aculhís de talhièrs, de taulas redondas e de conferéncias animats per d’especialistas del domeni. Aital, dètz rendètz-vos tematics son prepausats a l’entorn de la creacion audiovisuala, del teatre, de las musicas actualas, del patrimòni cultural immaterial e de la gastronomia.
 
 
Un vintenat de concèrts gratuits
 
Lo Forum, son tanben de nuèches de fèsta. Es un vintenat de concèrts gratuits prepausats durant tres seradas per una programacion qu’assembla lo melhor de las scènas occitanas e catalans d’uèi. Retrobatz los occitans de Deu Bartàs [Du Bartas], la Talvera, Vox Bigerri, Mauresca... mas tanben The New Catalan Ensemble, Maria Arnal i Marcel Bagés, Pirat’s Sound Sistèma… Un centenat d’artistas al rendètz-vos d’aquela granda scèna de las musicas actualas.
 
Podètz consultar totes los concèrts en linha.
 
 
Una granda fèsta de las culturas vivas
 
Espectacles, mòstras, passacarrièra musicala o d’animals totemics, iniciacions als espòrts tradicionals... Partissètz a la descobèrta de culturas vivas e abondosas al cors d’una programacion inedita e familiala. L’eveniment prepausa, entretant: Supereròi, adaptacion teatrala en occitan, presentada pel primièr còp a l’escasença del Forum; una invitacion a descobrir las colissas de Tralhaires, darrièra produccion de Joan-Francés Tisnèr; Bufa & Sons “Tubs del Món”, espectacle musical... E per los esportius: iniciacion al palet gascon, al tambornet o a las ajustas lengadocianas.
 
Podètz consultar lo programa complet en linha.
 
 
Lo Forum: qu’es aquò?
 
Lo Forum es un espaci de rescontres, un moment de dialògs entre las culturas e las disciplinas: musica, teatre, cinèma, gastronomia, fèstas e tradicions... nascut de l’enveja comuna de tres actors culturals d’Occitània e dels Païses Catalans: lo CIRDÒC, la Fièra Mediterranèa de Manresa et Sa Xerxa (Fièra de Teatre Infantil e Juvenil).
 
Consultatz en linha los detalhs, oraris e inscripcions.