Lo tribunal administratiu de Tolosa a anullat la declaracion d’utilitat publica de la Restanca de Sivens. O anoncièt divendres France Info. Tanben lo tribunal a anullat la derogacion a la lei pertocant las espècias protegidas e l’autorizacion d’eissartar.
 
Lo projècte de restanca, fòrça impressionant a l’inici, foguèt contestat lèu per un movement ecologista qu’ocupèt lo terren en creant una “zòna de defendre” (ZAD). Lo 26 d’octòbre de 2014, lo militant ecologista Rémi Fraisse moriguèt pendent una confrontacion entre los defensors del sit e los gendarmas antisusmautas. En 2015, lo projècte inicial de restanca lo remplacèron per un projècte pus modèst d’irrigacion.
 
Lo departament de Tarn, qu’a totjorn defendut la restanca o lo projècte d’irrigacion, a pas encara reagit a la decions del tribunal.
 
Un dels menaires locals del movement ecologista, Ben Lefetey, a declarat sus son compte Twitter: “Remetètz en bon estat la zòna umida del Testet destrucha illegalament. La justícia confirma que Rémi Fraisse foguèt tuat perque Valls e Carcenac [lo president del departament de Tarn] avián mandat defendre un chantièr illegal”.
 
 

Barrage #Sivens Justice confirme #RémiFraisse a été tué parce que Valls & Carcenac ont envoyé militaires défendre chantier illégal #encolère

— Ben Lefetey (@BenLefetey) 1 de juliol de 2016

 
 
Lo projècte inicial
 
La restanca prevista inicialment, d’un milion e mièg de mètres cubes d’aiga, deviá negar una partida de la Val de Tescon en tot far desaparéisser 13 ectaras de zòna umida e un milion d’animals salvatges (de granhòtas, de peisses o de salamandras). Lo conselh general de Tarn citava lo Ministèri francés de l’Environament, segon lo qual la restanca auriá de vertuts ecologicas, cercant un “equilibri idrologic” de la zòna. Los ecologistas o cresián pas, s’opausavan al projècte e denonciavan qu’èra finançat per de fonzes publics per favorir solament d’interèsses privats. Revendicavan la preservacion de totas las 35 ectaras de zòna umida menaçadas per la restanca. Denonciavan que la tòca del projècte èra de favorizar l’agricultura intensiva e que, per tant, èra un perilh per un centenat d’espècias “protegidas” dont cinc son ja declaradas menaçadas.
 
Segon lo conselh general de Tarn, la restanca èra indispensabla per irrigar las tèrras agricòlas e s’anava recrear una autra zòna umida. Los opausants denonciavan un projècte car que solament auriá servit a irrigar las tèrras d’un petit nombre d’esplechaires que practican l’agricultura intensiva.
 
L’occitanisme se mostrèt majoritàriament contra la construccion de la restanca, levat lo Partit de la Nacion Occitana (PNO) e l’associacion lo Clusèl (que manifestèt en favor de la restanca).