Al pè de la Ciutat dels vescomtes Trencavèl, unes rendètz-vos occitans vos espèran long de l’estiu.
 
 
En pichòt tren
 
Dempuèi la prima, lo pichòt tren de Ciutat prepausa la lenga occitana, entremièg lo dortzenat d’enregistradas, al mond que fan en mièja orada lo torn dels barris.
 
 
Sirventés d’Estiu
 
A l’Ostal Sirventés, del 4 al 15 de julh, se debana lo Sirventés d’Estiu amb la presentacion d’una mòstra de tablèus de Miquèl Porcel (1938-2001) entitolada Corbièras (a 18h30). En mai d’aquò se debana tres autres rescontres: amb lo cantaire Cristian Almerge, divendres 8; Claudi Martí e Patrici Cartier per presentar lo libre Je t’écris de Carcassonne-2 e l’istorian Paul Tirand per parlar del republican Armand Barbés.
 
 
Rescontre de musicas tradicionalas
 
Aqueste dimècres 6 de julh, dins los locals de la Calandreta de Ciutat, l’associacion Canti-Canta organiza la Fèsta de las Musicas Tradicionalas.
 
De 10h30 a 17h, se seguiràn de concèrts tematics, de talhièrs, de conferéncias musicalas, de mòstras, un instrumentarium medieval per descobrir e ausir unes instruments rars: calamèls, còrnamusas, laüts, guitarra flamenca... e tanben de cants dels repertòris occitan, egipcian, de las Illas Mascarenhas, catalan, irlandés, de las peninsulas italica e iberica…
 
De 18h a 21h30, serà lo temps del balèti; en primièr pels pichons; puèi per totes amb de danças d’Occitània e d’endacòm mai, en ronda, en farandòla, en cobles, en pista!
 
 
Òc-Lumina
 
La preséncia occitana es mai que magrinèla dins una programacion sens originalitat del Festenal de Ciutat: solament una serada (a gratis) amb Massilia lo dimars 23 de julh. Per contra, lo mes d’agost veirà una presentacion de la creacion son e lum-cants e paraulas de Cristian Salés Òc-Lumina dins lo Grand Teatre de Ciutat. De representacions se tendràn del 8 al 15 d’agost.
 
 
 
 
Alan Roch