Aperaquí 2900 personas son mòrtas dins las aigas de la Mar Mediterranèa pendent los primièrs sièis meses de 2016. Aquela primièra mitat d’ongan es venguda lo periòde pus mortal per l’immigracion dempuèi que ne comencèt la crisi e despassa del 50% lo meteis periòde d’arunan, çò rapòrta l’Organizacion Internacionala per la Migracion (OIM).
 
“Es alarmant de verai”, çò a declarat lo pòrtavotz de l’organizacion, Joel Millman, qu’a confirmat una chifra exacta de 2899 mòrts de genièr a junh. En 2015, la chifra de mòrts dels primièrs sièis meses foguèt de 1838, e en 2014 foguèt de 743.
 
“Es verai qu’Euròpa a fach un grand trabalh e que solament ongan òm a salvat de milièrs de vidas. Mas quand parlam de gaireben 3000 mòrts, aquò significa que fasèm pas tant coma podèm”, çò apond lo pòrtavotz.
 
Durant los primièrs sièis meses d’ongan son arribats 225 665 immigrants a travèrs de la rota de la Mediterranèa centrala fins a Itàlia, Grècia, Chipre e l’estat espanhòl, una chifra fòrça superiora a la de l’an passat, que foguèt de 146 000.