Lo primièr ministre francés Manuel Valls a refusat tornarmai la cooficialitat de la lenga còrsa e la creacion d’un estatut de resident sus l’illa, en declarant que se tracta de linhas rojas. “Avèm demostrat pels nòstres escambis e lo nòstre trabalh que de resultats èran possibles. Vòli far del dialòg lo nòstre modèl per l’avenir”, çò diguèt Valls aqueste diluns passat davant l’Assemblada de Corsega. “Mas i a de linhas rojas, o sabètz”, çò precisèt. Aquelas revendicacions, aprovadas per la majoritat de l’Assemblada de l’illa en mai de 2013, an vist repetidament lo refús de París.
 
“L’afirmacion de l’identitat còrsa passarà pas per l’exclusion, la cooficialitat de la lenga o l’estatut de resident”, çò diguèt Valls als elegits còrses. En mai d’aquò, gausèt quitament dire que “la Republica a una sola lenga oficiala, lo francés, car ela es practicada per totes”.
 
 
De classas bilinguas dins totas las escòlas
 
Almens, lo primièr ministre francés anoncièt la nòva agregacion de “lenga e cultura còrsas” e la creacion d’un vintenat d’emplecs dins l’acadèmia en tot reafirmant la tòca d’una filièra bilingua dins cada establiment escolar.
 
 
“Es inconcebable que i aja una segonda lenga oficiala”
 
Ja en junh de 2013, quand èra ministre de l’interior, Valls mostrèt son refús a la cooficialitat de la lenga còrsa que l’Assemblada de l’illa veniá d’aprovar. “La republica a concedit una plaça a la lenga còrsa e l’a reconeguda. Mas i a solament una lenga de la republica, lo francés”, çò diguèt en una entrevista a Corse Matin: “Es inconcebable que i aja dins una part del territòri una segonda lenga oficiala”.
 
 
“Qualques garentias” pels presonièrs politics
 
Al delà de l’afar lingüistic, lo president del Conselh Executiu de l’illa, Gilles Simeoni, e lo president de l’Assemblada Jean-Guy Talamoni obtenguèron e convenird amb Valls “qualques garantias” pels presonièrs politics. Dins aquel sens, los corsistas demandan una lei d’aminista concernissent los primièrs presonièrs e un transferiment vèrs de presons còrsas per los que restaràn embarrats. La posicion oficiala del govèrn francés es que “i a pas de presonièrs politics”. Pasmens, Valls declarèt que “la procedura de raprochament [seriá] ordenada en foncion de las plaças disponiblas”.
 
 
Collectivitat unica per 2018
 
Al respècte de la collectivitat unica, que remplaçarà l’actuala dels dos departaments, intrarà en vigor en genièr de 2018 e serà dotada d’una Cambra dels Territòris. Serà compausada “de representants de la Collectivitat de Corsega e de las comunas e intercomunalitats”, çò declarèt Valls, segon Le Figaro.