L’estat francés visquèt aqueste dimars passat sa dotzena jornada de mobilizacions socialas, sus un periòde de quatre meses, contra lo projècte de lei de la reforma del còde del trabalh. Los sindicats que s’opausan a la reforma an convocat lors enenas manifestacions dins las principalas vilas de l’estat. D’observators d’Amnistia Internacionala anèron susvelhar la manifestacion parisenca.
 
Mentretant, lo tèxte intrèt ièr per lo segond debat a l’Assemblada francesa, ont los deputats l'aculhiguèron amb una granda ostilitat.
 

Segond recors al 49.3
 
Lo govèrn socialista de Manuel Valls decidiguèt de recórrer tornarmai al 49.3 per far adoptar lo tèxt sens vòte—per  manca de majoritat per votar la lei, car una partida de l'esquèrra e dels quites deputats socialistas s’i opausan en la considerant tròp liberala. De son costat, l’oposicion de drecha la refusa coma insufisenta, e sos deputats quitèron l'emicicle del temps que Manuel Valls anonciava lo recors al 49.3.
 
L’executiu francés deu èsser fatigat après quatre meses de revòlta sociala en tot batre de recòrds d’impopularitat a mens d’un an de l’eleccion presidenciala, e justifica qu’aquela reforma del trabalh en disent que cèrca de combatre lo caumatge endemic, qu’ara es superior al 10%, e que facilita los contractes dins un mercat de trabalh mai flexible. Los adversaris creson que solament aumentarà la precarietat del trabalh. Lo Senat, dirigit per la drecha, enduriguèt la proposicion de lei del temps que lo govèrn negociava d’emendaments amb los sindicats. “Degun pòt pas dire que lo govèrn es inflexible o intransigent”, çò afirmèt Valls.
 
 
Valls fiulat a Montpelhièr
 
L’impopularitat d’aquela reforma es granda e cal soslinhar las nombrosas caumas dins los sectors del transpòrt e de l’energia. Un indicador fòrça grand d’aquela impopularitat se vegèt divendres passat a Montpelhièr, quand Valls foguèt fiulat per la molonada que permetèt pas al primièr ministre francés de far son discors, mentre qu’òm li mostrava de cartons roges.
 

 
 
Impopularitat d’Hollande e primàrias al PS
 
Dins aqueste contèxt, l’impopularitat del president francés François Hollanda es tala, que mantuns se pausan la question se serà el lo candidat a l’eleccion presidenciala de 2017, çò qu’el a pas encara confirmat.
 
De son costat, lo Partit Socialista s’es vist obligata a anonciar de primàrias a començament de 2017 per elegir lo candidat a la presidéncia.
 
 
La reforma del còde del trabalh
 
Dins la linha de çò que marca la tròica, aquela reforma ditz voler “protegir los salariats, favorir l’emplec e donar mai de marge de manòbra a la negociacion en entrepresa”. Dins la practica, manten la setmana de 35 oras, mas facilita los licenciaments, permet d’esperlongar la durada de la jornada de trabalh sens besonh d’acòrdi amb los trabalhadors, e permet de far demenir la remuneracion de las oras suplementàrias.
 
Los sindicats refusan quitament la nòva version que lo primièr ministre Manuel Valls presentèt lo 14 de març passat, en seguida de fòrça protèstas e d’una autra jornada de cauma generala que mobilizèt mai de 250 000 personas segon los principals mèdias. Aquela rescritura a pas convencut los sindicats: la CGT e l’UNÈF mantenon lor oposicion. En mai d’aquò, lo patronat, representat pel MEDÈF, qu’èra en favor del nòu projècte de lei, ara se ditz decebut.
 
Valls presentèt una version “corregida” de son projècte de lei, conegut coma “Lei Trabalh” o “Lei El Khomri”, amb qualques cambiaments. Lo mai remarcable seriá que lo barèm que deu limitar las indemnitats per licenciament serà solament “indicatiu”.