A bòrd de la nau espaciala Juno, que dempuèi diluns es a orbitar a l'entorn de Jupitèr, i a pas cap d’esquipatge; sonque qualques aparelhs de mesura que permetràn d’explorar la planeta mai granda del Sistèma Solar amb fòrça detalhs. Ça que la, a bòrd de Juno i a tanben tres figurinas de Lego, qu'an viatjat pendent cinc ans dempuèi la Tèrra a Jupitèr, en suportant una granda velocitat, de radiacion e de temperaturas extrèmas. Son de reproduccions de Lego de Galileo Galilei, del dieu roman Jupitèr e de sa femna Juno.
 
En genièr de 1610 Galileo Galilei observèt pel primièr còp los quatre satellits mai grands dels seissanta tres qu'a Jupitèr. Son los nomenats satellits galileians: Io, Euròpa, Ganimèdes e Callisto. Pendent qualques jorns observèt que las pichonas estelas qu'observava pròche Jupitèr viravan, orbitavan a son entorn. Per tant lo nom del fisician e matematician toscan es totjorn estat restacat al de la planeta giganta; e es per aquela rason que lo representa una de las tres figurinas de Lego a bòrd de la sonda Juno, en sostenent una maqueta de la planeta e lo sieu telescopi. Lo dieu Jupitèr a dins las mans un fais de liuces e Juno, una lopa, que simboliza la recèrca de la coneissença.
 
Aquelas figurinas son pas convencionalas. Son fachas d’una sola pèça d’alumini, que lor deviá permetre de suportar las condicions extrèmas del viatge.
 
Aquela iniciativa fa partida d’un projècte conjonch de la NASA amb Lego per la difusion de la coneissença scientifica. L’agéncia espaciala encoratja lo mond a participar al concors de Lego e de la NASA de construccion de modèls sus l’avenir de l’exploracion espaciala. “Avèm mes aquelas figurinas de Lego a bòrd de Juno per inspirar e motivar los enfants, per que partegen l’estrambòrd per l’exploracion espaciala”, çò ditz Scott Bolton, lo principal cercaire del projècte Juno.