E mai se la Val d’Aran a viscut qualques còps lo pas del Torn de França, ongan aculhirà per lo primièr la sortida d’una estapa, mai concretament la 9a. L’espròva esportiva arribarà deman dissabte en Aran, e partirà vèrs Catalonha dimenge. Lo Conselh General d’Aran a preparat l’aculhiment d’aquel eveniment amb una seguida d’accions prèvias durant los meses de març e de junh amb la preséncia de ciclistas notables qu’an participat al Torn de França. En mai d’aquò, dimenge i aurà una seguida d’activitats pels escolans d’Aran e pels afeccionats de ciclotorisme.
 
 
 
Lo Torn de França en Occitània
 
Lo Torn de França comencèt ongan en Normandia. Intrèt en Occitània lo 5 de julhet passat dins sa 4a estapa, a Lemòtges. Es passat per la Vaissièra e lo Pajon d’Orlhac (Monts del Cantal), Montalban (Bas Carcin), L’Isla de Baish (Savés), lo Lac de Paiòla (Val d’Aura), Pau (Bearn) e Banhèras de Luishon (Comenge). Deman arriba en Aran e dimenge quitarà lo país nòstre per intrar en Catalonha. Dimars que ven, 12 de julhet, partirà d’Andòrra e intrarà en Occitània pel País de Fois per arribar a Revèlh (Montanha Negra). Puèi passarà per Carcassona, Montpelhièr e arribarà a Ventor (Comtat Venaicin) dijòus 14 de julhet. Après aver vesitat lo Borg Sant Andiòu e Valon-Pont de l’Arc (Bas Vivarés), l’espròva esportiva quitarà Occitània lo 16 de julhet après començar a Montelaimar (Vaudaina). Puèi contunharà qualques jorns en Arpitània e quitament en Soïssa germanofòna per s’acabar lo 24 de julhet a París.