Un tribunal d’Haifa, en l’estat d’Israèl, decidiguèt que la mòrt de la pacifista estatsunidenca Rachel Corrie foguèt un “accident lamentable”. Corrie, qu’aviá 23 ans, èra volontària pròche del Movement Internacional de Solidaritat amb Palestina a Rafah (Lista de Gaza) e foguèt esclafada per un buldozèr de l’armada israeliana en Gaza, en març de 2003. Corrie se placèt davant la maquina per ensajar d’evitar la demolicion d’un ostal palestinian. Lo menaire arrestèt pas lo buldozèr.

Los parents de Corrie avián presentat en 2005 a Haifa una denóncia qu’acusava l’estat d’Israèl d’omicidi intencionat e illegal e a l’encòp d’aver pas menat a tèrme una investigacion fisabla.
 
Pendent la lectura del verdicte al tribunal, lo jutge afirmèt que Corrie moriguèt per un “accident lamentable”, e que l’estat d’Israèl èra pas responsable de cap dels “damatges causats”, perque se debanèron dins un encastre de guèrra. “Refusi la demanda. I a pas cap de motiu per reclamar a l’estat lo pagament de damatges”, çò diguèt lo jutge. Los soldats faguèron tot çò que podián per alonhar las gents del luòc e “ela se n’apartèt pas, çò qu’auriá fach tota persona senada”, çò apondèt lo jutge.
 
L’avocat de la familha, Husayn Abu Husayn, considèra que la decision del tribunal es contrària als “principis fondamentals” del drech internacional relatius als defensors dels dreches umans. La familha, e mai se ditz qu’es pas estonada, esperava una senténcia contra l’armada israeliana e qu’aital venguèsson mai respectuoses amb los dreches umans.
 
Un dels vaissèls mai coneguts de la Flotilha de Gaza pòrta lo nom de la pacifista tuada.