Tròp sovent arriban d’informacions de fusilhadas per carrièras e dins d’espacis publics dels Estats Units. Après cada masèl se dobrís lo debat sul possible endurziment de la legislacion de las armas de fuòc dins lo país, que demòra sovent blocat pel poderós lobby de la National Rifle Association. Per ensajar de far prene consciéncia del besonh de regular las armas, la revista Wired a publicat nòu grafics amb “las esmoventas donadas darrièr lo problèma de la violéncia armada als Estats Units”.
 
Dins un rapòrt entitolat “La murtrièra dependéncia estatsunidenca de las armas, en chifras”, la revista californiana destaca un ensems d’estatisticas pas gaire difondudas a l'entorn de la “cultura de las armas” dins lo país, que permet de se far una idèa mai precisa de çò que representan. Se tracta de donadas extrachas d’estudis de qualques institucions qu'apòrtan d’informacions e de comparasons de còps estonantas. Es lo cas de la donada que lo 75% de las armas de fuòc del Mond son a l’ora d’ara a las mans de civils: los ciutadans dels Estats Units son al cap de la lista, seguits de mai luènh per los d’Índia, de China, d'Alemanha e de França.
 
Dins un autre rapòrt se pòt saber que lo nombre d’armas de fuòc nòvas dins aquel país a triplat dins los darrièrs quinze ans, e mai s’aquò a pas comportat per ara un aument de la mortalitat per las armas de fuòc. Ara, e mai se los Estats Units son pas lo primièr país en çò que tanh a las victimas mortalas per de fusilhadas, son a la dotzena posicion del classament mondial, just jos Burundi… un país african que lo quite Departament d’Estat estatsunidenc aconselha de vesitar pas per de rasons de seguretat.
 
Los grafics publicats per Wired demòstran tanben que, encara que lo nombre de murtres als Estats Units s’es multiplicat dins los darrièrs ans, aumenta pas lo sosten a mai de contraròtle e  de regulacion de las armas. Davala! Quitament s’òm sap que gaireben la mitat de las nòvas armas s’aquerisson per de mejans pauc regulats, coma los amics, las fièras d’armas, de crompas per Internet, d'eiretatges, de presents...