Dimars au matin, los militants deu “Collectif pour la Réquisition, l’Entraide et l’Autogestion” (Collectiu per la Requisicion, l’Ajuda mutuala e l’Autogestion) (CREA) estoren bandits deu bastiment qu’ocupavan dempuish un an e miei. Arrestèren cinc sòcis deu collectiu.

Lo bastiment, situat au 70 de l’andana de las Domaisèlas, aubergava militants e familhas (40 adultas e 15 dròlles). Las familhas avèn deishat lo lòc quauques temps a, devant la miaça d’expulsion. Dimars, sonque militants demoravan encara entre las parets deu CREA, quand los gendarmes mobiles e los CRS se presentèren. Segon la Dépêche du Midi, lo quite GIPN de Bordèu s’èra desplaçat, per cas.
 
Mei d’un lòc d’abitacion, lo CREA prepausava tanben activitats numerosas e variadas, dens la dralha deus centres sociaus alternatius. Talhèirs de lectura, de lenga francesa, de codina, permanéncias psicologicas per exèmple, èran organizadas e daubèrtas a tots.
 
Dimèrcs, una delegacion de sòcis e simpatizants deu CREA encontrèt la Direccion regionala de la Joventut, deus espòrts e de la coesion sociala (proprietaris deu bastiment), entà sajar de comunicar dab lo ministèri per desblocar la situacion. Capitèren pas. Tres sòcis de la Brigada Activista deus Palhàs estoren arrestats, per estar liberats un chic après.
 
 
Lo cambiament, es adara
 
Peus militants deu CREA e de las organizacions que tribalhan a l’entorn, aquera expulsion es l’illustracion de la politica messorguèira de l’esquèrra au poder. A la debuta de junh, un collectiu de mau-lotjats avè interpellat la futura ministri deu lotjament, la verda Cecile Duflot. Avè promes que n’i auré pas d’expulsion shens solucion de relotjament. Egau, un comunicat deu 260 (un aute squat tolosenc) bremba que “lo cambiament (tema de campanha de François Hollande, ndr), es d’aver expulsat mei de squats de mau-lotjats, de demandaires d’asili, de rroms en un estiu que non pas Sarkozy en cinc ans”.
 
Au moment de l’audiéncia qu’avè prononciat l’expulsion, lo 29 de junh passat, la prefectura avè anonciat sa volontat de har d’aqueth lòc “un centre d’aubergament per las familhas en situacion de precaritat, que daubriré tanlèu l’ivèrn”.
 
 
 
 
Pèir-Joan Masdiset