A Gèmas (País Marselhés), se la situacion avança, pasmens se’n pòt pas veire la fin. La comunautat Marselha Provença Metropòli (MPM), que deu tornar crompar lo sit de Fralib Gèmas ont se fabrica lo tè L’Elephant, per fin d’i mantenir l’activitat industriala, a anonciat que demandava un relambi abans de signar l’acte de crompa.

Aquela demanda de relambi seguís los tesics enonciats pels quites salariats, qu’an paur  qu’Unilever respècte pas las siás promessas de vendre, amb los terrens e los bastiments, l’integralitat de las maquinas. Aquò empachariá lo mantenement de l’activitat industriala, o almens lo complicariá. MPM demanda de garentidas, aital, e torna dire la siá volontat que totas las maquinas demòren sul sit.
 
La transaccion, anonciada al començament d’agost, es estimada a 5,3 milions d’èuros (la valor del terren). Las maquinas e totes los esquipaments serián daissats per un èuro simbolic. Mas lo gèst deu pas amagar totun una engana, çò crenhon los sòcis del collectiu de salariats.
 
Los salariats encontraràn divendres de conselhièrs del president francés, François Hollande, per evocar l’avenir del sit. Lo projècte es a se desvolopar: d’investidors s’interèssan al projècte (demest los quals i a lo grop Lustucru) e son a téisser de ligams amb de productors de tè en Vietnam. Aital, un nòu encontre entre Estat, collectivitats territorialas, emplegats e Unilever es estat programat pel mes de setembre. S’i parlarà del projècte de societat cooperativa e participativa (SCOP) que los emplegats depausaràn lèu-lèu. Mas Unilever s’opausa a aquel projècte sus dos ponches importants: refusan de daissar la marca L’Éléphant als emplegats, e refusan tanplan de sostenir la futura entrepresa en l’emplegar coma sostractanta.

Parallèlament, la lucha contunha. Los salariats e militants apitan d’accions de sensibilizacion amb la populacion. Distribucion de tractes dins los supermercats Auchan a Aubanha e al Martegue, peticion qu’amassa mai de 13 000 signaturas, campanha de boicòt dels produches Lipton: los Fralib mantenon la pression. Après mai de 700 dias de lucha, la situacion s’aclarís, un pauc, mas degun es pas encara en estat de veire la lutz a la fin del tunèl.