L’Estat Islamic a revendicat uèi dissabte l’atemptat de Niça de dijòus passat. L’organizacion jihadista a mandat un comunicat a l’agéncia Amaaq que presenta lo menaire que tuèt ochanta quatre personas coma “un soldat”.
 
Tanben uèi de matin, la polícia francesa a detengut tres personas presumidament restacadas a l’atemptat. Segon de fonts policièras an detengut de personas pròchas de l’assalhidor, e ara son a enquestar se Mohamed Lahouaiej Bouhlel aguèt de complices.
 
 
Primièr jorn de dòl oficial
 
Uèi es lo primièr dels tres jorns de dòl oficial decretats après l’atemptat. Lo president, François Hollande, a presidit ben d’ora a l’Elisi una reünion del Conselh de Seguretat e Defensa qu'a comptat amb la preséncia del primièr ministre, Manuel Valls, e dels ministres de l’interior, dels afars exterioras e de la defensa, e d’autras autoritats.
 
 
Fòrça ferits dins un estat critic
 
Lo nombre de mòrts per l’atemptat de Niça pòt aumentar dins las oras avenidoiras. Es çò qu'a dich Hollande, en tot afirmar que i a un cinquantenat de ferits entre la vida e la mòrt. L’atemptat de Niça a provocat per ara 84 mòrts e 202 ferits, dont 52 se tròban dins un estat critic, e 25 son en fasa de reanimacion.
 
 
De nombroses musulmans mòrts
 
En omenatge a las victimas, lo jornal local Nice-Matin a fach un perfil de las primièras vicitimas. Demest los mòrts i aviá de nombroses musulmans, e tanben de ciutadans d’autres païses coma Russia, Tunisia, Marròc, China o Alemanha.