Après lo còp d’estat mancat, lo president de Turquia, Recep Tayyip Erdoğan, a aplicat immediatament una repression fòrça dura contra los qu’el considèra responsables de la rebellion, sustot de militars e de jutges. Delà las 265 personas mòrtas durantla temptativa de còp d’estat, i a 2839 militars detenguts, dont dos generals. Uèch militars an fugit en elicoptèr en Grècia, ont an sollicitat l’asil politic, una demanda qu’ara examinan las autoritats grègas. De mai, la polícia a detengut dètz jutges del Danıştay (lo Conselh d’Estat e la jurisdiccion suprèma de l’òrdre juridiccional administratiu de la republica). Tanben i a un mandat de recèrca e d'arrest per trenta uèch membres d’aquel organisme e contra 140 jutges de la Cort Suprèma. Las detencions se son practicadas contra totes los jutges que pòscan aver una relacion amb Fethullah Gülen, exiliat als Estats Units e rival politic del partit islamista que govèrna ara Turquia, lo Partit de la Justícia e del Desvolopament (AKP). En mai d’aquò, las autoritats turcas an raportat la destitucion de 2745 jutges mai.
 
Aquò es pas tot: lo govèrn turc a admés que pensa de reïntroduire la pena capitala, abolida en aquel país l’an 2002, una mesura que se prenguèt per dobrir lo camin devèrs l’Union Europèa.
 
“S’agís d’un acte de traïson. Los responsables pagaràn un prètz fòrça naut”, çò afirmèt lo president Erdoğan a l’aeropòrt d’Atatürk dins un banh de molonada quand arribèt lo matin de dissabte après la malescasuda del putsch.
 
Après una reaccion iniciala flaca de la comunautat internacionala, lo sosten explicit dels Estats Units al govèrn d’Erdoğan a l’entorn d’una ora de la matinada de dissabte, la balança basculèt. Dins un comunicat brèu, Obama faguèt una crida “a totas las partidas” implicadas dins lo conflicte de Turquia a sosténer lo govèrn “elegit democraticament”, en evitant la violéncia e lo sang. Qualques minutas après, lo presumit cap de la conspiracion se seriá rendut. Puèi reagiguèt lo secretari general de l’OTAN, Jens Stoltenberg, en fasent un apèl a la calma e al respècte per las institucions democraticas e la Constitucion de Turquia, un país qu’el definiguèt coma un “preciós aliat”. Just abans doas oras de la matinada, lo Servici d’Intelligéncia de Turquia (MIT) anoncièt la malescadusda putschista, e mai se reconeguèt que demoravan encara qualques fogals de resisténcia de militars rebèls.
 
 
Un còp d’estat de sièis oras
 
Divendres de ser, de soldats armats de divèrsas unitats de l’armada turca barrèron los ponts a Istambol, ocupèron l’aeropòrt pendent qualques oras e se despleguèron dins qualques zònas de la capitala, Ankara. De grops de soldats ocupèron tanben las redaccions dels principals jornals e televisions e qualques bastissas del govèrn.
 
Erdoğan aviá menat a bon tèrme los darrièrs ans una importanta purga entre los militars, qu’eles se considèran coma los garants del laïcisme, contra l’islamisme, mas òm esperava pas que se poguèsse passar un còp d’estat precisament ara.