Actualitats
Immigrants sense atencion sanitària en Estat espanhòu
Eth govèrn catalan ditz que non acomplirà eth decrèt e quauqui mètges an creat un registre d’objectors de consciéncia
A compdar de deman quauques persones be poderàn aver problèmes entà accedir ara sanitat publica en Estat espanhòu. A compdar d’aguest dissabte 1 de seteme qu’entrarà en vigor eth reiau decrèt deth govèrn espanhòu que limite er accès ara sanitat publica as immigrants sense papèrs.
Ena Val d’Aran que i viuen mès 2400 persones neishudes dehòra der Estat espanhòu des qu’un centenat an eth risc de trapar-se sense drèt ara atencion medicau. Per çò qu’ei de tot er Estat ues 150 000 persones demoraràn sense carta sanitània.
Eth govèrn dera Generalitat de Catalonha qu’a garentit que cap de persona e demorarà sense atencion medicau, segontes a dit eth conselhèr de Salut dera Generalitat de Catalonha Boi Ruiz. Totun es immigrants qu’encara siguen en situacion irregulara e auràn d’acreditar aumens tres mesi de recensament entà arrecéber atencion sanitària publica ena comunautat autonòma de Catalonha e Aran. Que calerà presentar un document especiau que cau renauir annauments. Segontes eth Servici Catalan dera Salut, era tòca d’aguest document qu’ei d’evitar eth torisme sanitari.
Ena sua conferéncia de premsa d’agèr, Ruiz ce expliquèc, que damb aguesta formula eth govèrn e “complís damb eth reiau decrèt que regule era condicion d’assegurat, mès va ath delà, en tot seguir era conviccion qu’era salut ei un dret dera ciutadania e non depen de se s’ei beneficiari o non dera Seguretat Sociau”.
Un shinhau abans, eth conselhèr de Benestança Sociau, Josep Lluís Cleries, que diguèc en Catalonha Ràdio qu’era mesura e ère un “clar arrepè”. Segontes Cleries eth govèrn espanhòu non pren cap en carga era sua responsabilitat de gerir era immigracion e ath delà la dèishe sense atencion medicau en servici dera salut publica. “Era assistència as estrangèrs be compòrte un benefici entara salut de toti es ciutadans” ce ahigèc eth conselhèr de Benestança Sociau.
Es mètges qu’an creat un registre d’objectors de consciéncia
Era volontat deth govèrn catalan de non acomplir eth decrèt deth govèrn espanhòu entà excludir as immigrants sense papèrs deth sistèma sanitari que coïncidís damb era postura de fòrça mètges. Aguest grop professionau qu’a creat un registre d’objectors de consciéncia.
Jaume Sellarès, membre deth conselh deth Collègi de Mètges de Barcelona, qu’assegure que “s’un pacient ère diabetic abans deth decrèt, b’ac contunharà d’èster, e donques lo calerà tanplan atier”. Es mètges objectors qu’ahigen qu’era atencion primària a toti ei quauquarren d’innegociable.
Totun, es facultatius objectors de consciéncia plan qu’acceptarien es mesures coma qu’as immigrants en situacion irregulara e non se les podessen hèr recèptes o trasplantacions. Alavetz que los contunharàn de suenhar, maugrat que non los poderàn hèr cap de pròva. S’eth govèrn espanhòu los declare insomesi, be los poderien imposar sancions administratives.
Ferriòl Macip
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Es la debuta del començament, primier los immigrants sens papiers a la fin te caldrà ensenhar la carta Visa o Mastercard per passar lo lindal de l'espital.
"Immigrants sense atencion sanitària en Estat espanhòu" ? Amb lo neoliberalisme impausat a còps de crisi del deute e de decretalas constitucionalas per una oligrarquia inelegida al cim d'Euròpa, lèu seràn 99% de la populacion d'Euròpa tota que serà tractada aital? per estalviar als mai rics de pagar las talhas e "descoratjar pas aital l'esperit d'entrepresa privada". Aquò se ditz la "dreita" d'ara. Es d'una Euròpa aital, que volètz, o volètz "objectar en consciéncia", Ipocrates o pas ?
Cal préner la moneda ont s'amaga, mai que mai dins los dividendas e las transaccions borisèras, per los impausar fòrt e mòrt ! Tot revengut qu'es pas obtengut coma la fruta d'un trabalh complit pel sieu beneficiairi dèu èsser impausada de mai de 75%, e aiçò, quitament a las Islas Caïman…. N'anam trobar, en mens d'un an, de qué reglar los "deutes sobeirans" e tornar instaurar una medecina per totes, e pertot. E ma ide qué noirir Africa !!!
Aquesta novèla m'evòca doás causas.
En primièr, totes los mètges del monde occidental pronóncian lo jurament d'ipocrates a la debuta de lor carrièra professionala. Aquò implica que tenon l'obligacion de suenhar. Non o far pas lor metriá de facto defòra de la corporacion medicala. Qu'un pacient imigrant illegal se presente a una mètge e que lo mètge refusa de l'examinar, çò qu'arriba es que lo pacient demòra pacient mas lo mètge demòra pas pus mètge.
Puèi i a la question dels fraisses medicals. E aquí los estats o las comunautats, tenon lo poder de fargar las leis socialas que vòlon. Aquò se sòna sobeiranetat.
La presa en carga dels fraisses medicals pels estrangièrs es un problèma que merita una reflexion pregonda. Personalament pensi quòm pòt èsser a l'encòp fòrça umanista e refusar de se far panar.
Donarai un exemple. A costat del miu ostal vivon un parelh d'angleses. Tenon unes 50 ans. La seguritat sociala britanica essent pas terrible, cal sovent esperar meses e annadas abans d'accedir als suènhs. Pendent las vacanças an fait venir lor mameta d'Anglatèrra per què se far operar de l'anca. Còst de l'operacion: 120 000 € ! Aquò es un cas tipic de torisme medical. Per ieu es pas normal que la comunautat occitana paga per aquò.
Dins mon vilatge fa encara 15 ans i aviá 5 mètges, 1 especialista dels uèlhs, de la pèl, un pediatra, una clinica amb maternitat e sala d'operacion.
Ara, demòra 3 mètges e un service d'acuèlh d'urgéncia.
Los mètges son pas en question: l'abaissament de l'ofèrta de suènhs ven de la marrida gestion per l'organisme de seguritat sociala francés.
Las institucions francesas, ben segur, son una cachavièlha pel benestar d'Occitània...
Mas aquò es una autra question...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari