Se tenguèt diluns passat en Aran una reünion de trabalh entre d’elegits araneses e comengeses per mentre en marcha los trabalhs del projècte transfrontalièr d’un percors ciclable entre la font de Garona, al Plan de Beret en Aran, e Tolosa, amb la tòca de favorir la mobilitat de las personas. Assistiguèron a la reünion lo conselhièr del territòri del Govèrn d’Aran, José Antonio Boya; lo conselhièr departamental del canton de Puègbonieu (Comenge), Didier Cujives, e la conselhièra departamentala del canton d’Auta-Riba, Maryse Vézat-Baronia.
 
Lo projècte es menat a bon tèrme pel Conselh General d’Aran e lo Conselh Departamental de la Nauta Garona, e s’inclutz dins un dels cinc aisses fondamentals del programa transfrontalièr POCTEFA, per que l’oferta de transpòrt transfrontalièr respècte l’environament e favorisca los desplaçaments de personas e de merças.
 
En març passat i aguèt una primièra reünion a l’estacion d’esquí de Mortis, a la comuna de Bots (Comenge). En aquela escasença, lo govèrn aranés s’amassèt amb lo Conseh Departamental de la Nauta Garona e amb la Comunautat de Comunas del Canton de Sant Beat per parlar de divèrses projèctes transfrontalièrs que i participaràn las institucions aranesas e comengesas.
 
 
Minuta de silenci
 
La reünion s’arrestèt una minuta a miègjorn, per jónher la minuta de silenci en memòria e solidaritat de las victimas del masèl de Niça.