Las autoritats de Bulgaria an detengut 45 immigrants qu’ensajavan de traversar la frontièra cap a Serbia, segon çò que raportèt dimars passat lo ministre de l’interior. Tres jorns abans, Belgrad aviá aumentat las patrolhas frontalièras per evitar lo passatge de las personas.
 
En mai dels detenguts sus la frontièra, las autoritats an arrestat 160 personas dins la capitala, Sòfia, per ensajar d’evitar que lo país venga una rota de passatge dels refugiats que fugisson la guèrra e la pauretat a l’Orient Mejan.
 
Lo primièr ministre sèrbe, Aleksandar Vučić, assegurèt dimenge passat que son país vendriá pas un “centre collectiu pels immigrants”.
 
Dels detenguts aqueste dimars passat, 30 èran afgans, 13 de Pakistan e dos iranians, segon çò qu’an raportat las autoritats.
 
Lo ministre de l’interior bulgar, Georgi Kostov, declarava diluns que Sèrbia se deviá pas preocupar de la manca de seguretat sus la frontièra e assegurèt que la pression migratòria èra “normala en aquesta sason”.
 
Lo nombre d’immigrants qu’intra en Bulgaria s’es vist reduch de manièra modèsta. Lo país a arrestat aperaquí 14 000 immigrants dins los primièrs sièis meses de l’an, çò que contrasta amb los 21 000 detenguts dins las meteissas datas de 2015.
 
Un nombre fòrça bas dels immigrants qu’arriban a Bulgaria vòlon demorar en aquel país, qu’es lo mai paure de l’Union Europèa. La majoritat preferisson entreprene lo viatge devèrs de païses mai rics coma Alemanha o Suècia.
 
A causa de la temptativa de còp d’estat en Turquia, Bulgaria a refortit tanben sa seguretat sus la frontièra amb aquel país, e mai se las autoritats assegurèron que i aviá pas agut d’indicis d’un aument d’immigrants a causa de la turbuléncia politica de Turquia.