Pavel Sheremet, un jornalista de renom que trabalhava pel jornal Ukrayinska Pravda, moriguèt dimècres après qu'una bomba aguèt esclatat dins la veitura que lo menava a Kyiiv, segon çò qu’a raportat aquel meteis jornal. De fonts de la  polícia ucraïnesa an dich que s'agissiá d’un assassinat comés amb premeditacion.
 
“La veitura a espetat al caireforc de las carrièras Bohdana Khmelnytskoho e Ivana Franka, davant un McDonald’s”, çò precisèt lo mèdia, segon çò que rapòrta l’agéncia Interfax Ucraïna, en precisant que la veitura aperteniá a la directritz del jornal, Olena Prytula, e mai s’ela i anava pas dedins.
 
Segon lo pòrtavotz del Ministèri de l’Interior ucraïnés, Artem Shevchenko, esclatèt una bomba estacada a la veitura. “Segon las primièras informacions, es estat un artefacte explosiu, e mai se son los expèrts que determinaràn s’es artesanal o pas”, çò soslinhèt a la cadena 112 Ukraina, en precisant que la victima se tròbava pas dins l’automobila.
 
D'après la polícia de Kyiiv, l’afar es classat coma un assassinat amb premeditacion e a començat una enquèsta, çò rapòrta l’agéncia russa Itar-Tass.
 
Sheremet, nascut a Minsk, la capitala de Bielorussia, trabalhèt per la cadena russa ORT de 1998 a 2009, puèi a la revista Ogonyok. Los darrièrs cinc ans, èra al servici del jornal ucraïnés a Kyiiv e aviá tanben un programa de ràdio a Vesti.
 
“Soi en estat de chòc, sabi pas qué dire, es una question d’onor per la polícia d'examinar aquel afar”, çò declarèt als mèdias la directritz de la polícia ucraïnesa, Khatia Dekanoidze, coma o rapòrta Reuters, en prometent qu'ela meteissa prendriá l’afar en carga.
 
Lo fondador d’Ukrayinska Pravda foguèt Georgiy Gongadze, un jornalista d’investigacion assassinat fa 16 ans e que son còrs foguèt trobat decapitat dins un bòsc a l’entorn de Kyiiv.
 
 

The moment when the prominent journalist Pavel #Sheremet (@ukrpravda_news) was killed in #Kyiv by a car bomb. RIP pic.twitter.com/lUVkA3e2gM

— Onlinemagazin (@OnlineMagazin) 20 de juliol de 2016