Àlex Moga, baile de Vielha, que ditz qu'eth Palai de Gèu e "supause un desborsament de 300 000 èuros per an", que deu assumir era municipalitat pr'amor que non a capitat era ajuda des auti municipalitats araneses. En cas de non arténher es sòs de besonh, Moga que pense en mesures coma apujar es prètzi des abonaments o grauar era mantenença deth Palai damb es impòsti des ciutadans. Vaquí era qüestion que Moga vò consultar ara poblacion.


 

Eth Palai de Gèu, qu'ei ua bastissa damb tot tipe d'installacions esportiues. S'inaugurèc en cap-lòc aranés en 1994. Ath delà des còsti annaus dera mantenença, er equipament qu'acumule un deute de 700 000 èuros, segontes era oposicion.

 

Ça que la, er Ajuntament de Vielha e Mijaran qu'a dificultats entà afrontar es pagaments e b'ei per açò que demanèc ajuda as autes municipalitats deth país. "Eth Palai de Gèu qu'ei ua infrastructura que beneficie a totes es poblacions dera Val d'Aran” ce diguèc Moga ath jornau catalan. Mès peth moment, eth rèsta de bailes qu'an arrefusat era peticion pr'amor qu'an tanplan fòrça problèmes economics.

 

Eth Conselh Generau d'Aran que s'auie engatjat a aportar eth doble de sòs qu'es ajuntaments deth país, mès en aguest cas, eth doble d'arren b'ei arren e era vila de Vielha aurà de pagar soleta tota era mantenença.

 

Coma darrèr recors, Moga que demanarà amassar-se damb eth conselhèr de Territòri e Sostenibilitat dera Generalitat de Catalonha, Lluís Recoder.




Ferriòl Macip