Ièr dimars, aterrèt sus l’aeropòrt d’Abu Dhabi (Emirats Arabis Units) Solar Impulse 2, un avion abitat qu’a fach lo torn del Mond en estapas dempuèi març de 2015, propulsat solament per energia solara. Foguèt lo prince monegasc Albèrt II que diguèt lo “go” oficial en març d’arunan. Durant tot aquel temps òm a pogut seguir totas las informacions de la gabina e las comunicacions entre los pilòts amb lo centre de contraròtle internacional, situat a Mónegue, gràcias a un sit web.
 
L’aparelh, pilotat per André Borschberg e Bertrand Piccard, es estat propulsat per dètz e sèt mila cellulas solaras dispausadas long dels setanta dos mètres d’alas. “Aqueste moment es fòrça especial per nosautres, avèm completat aquel viatge pauc a cha pauc e sèm plan esmoguts per l’arribada a Abu Dhabi”, çò declarèt Borschberg tanlèu aterrat. De son costat, Piccard assegurèt que lo torn del Mond fach per l’avion solar èra “pas una reüssida de l’istòria de l’aviacion mas de l’istòria de l’energia”. “Avèm percorregut 40 000 quilomètres sens combustible”, çò soslinhèt en tot avertir que se podiá pas acceptar “un Mond contaminat”.
 
Amb Solar Impulse 2, los dos pilòts an percorregut mai de 40 000 quilomètres, amb una altitud maximala de 8500 mètres e una velocitat de 140 quilomètres per ora. An fach 17 estapas sus un total de mai de 500 oras en subrevolant la mar d’Arabia, Índia, Birmania, China, los oceans Pacific e Atlantic, los Estats Units, lo sud d'Euròpa e lo nòrd d'Africa.
 
Après dotze ans d’investigacion, Solar Impulse 2 a fach aquela proesa amb la tòca principala de promòure las energias e las tecnologias netas e, de rebucada, de luchar contra lo rescalfament mondial e lo cambiament climatic.

 

.@bertrandpiccard made one last smooth landing, kissing the tarmac after a 48h37min flight https://t.co/9DABXSxJsepic.twitter.com/vmIwtJofIU

— SOLAR IMPULSE (@solarimpulse) 26 de juliol de 2016