“Los musulmans catalans permeton pas que Qatar ni mai l’Arabia Saudita lor paguen de mosquetas”, çò afirmèt Dolors Bramon dins una entrevista facha per Vilaweb. Bramon es lingüista especializada en lengas semiticas e expèrta de l’islam.

Los musulmans del Principat de Catalonha an pas de mosquetas en bon estat, e van a pregar dins de calabèrts industrials, d'installacions esportivas, en plen aire o ont pòdon. “Son fòrça maltractats e an drech d’anar pregar dins un luòc mai digne”. Per contra, segon Dolors Bramon, “los musulmans en Catalonha an lo sen qu’òm ditz qu’avèm los catalans. Per tant an pas permés que l’Arabia Saudita lor pague cap de mosqueta. E mai s’o an ensajat, eles an dich de non”. En mai d’aquò, precisa que lo celèbre club de fotbòl de Barcelona, qu’ela n’es afogada, “s’es daissat pagar per Catar, a la diferéncia dels musulmans catalans qu’an refusat que los pague Catar ni mai l’Arabia Saudita”.
 
Segon Bramon, los musulmans catalans sabon que se l’Arabia Saudita o Catar “pagan una mosqueta, eles mandaràn lor imam correspondent. E los imams formats en Arabia Saudita a ieu me fan paur”. Bramon explica que los imams del pòble son d’immigrants coma la majoritat de musulmans catalans, mas que los imams que l’Arabia Saudita manda dins los endreches que ne paga las mosquetas “desnaturan e desforman l’Alcoran”.
 
 
Cal pas los nomenar “islamistas”
 
Fa qualques jorns, Dolors Bremon disiá, dins un article, que caliá far atencion a l’emplec dels mots e dire pas “Estat Islamic” mas “pretengut Estat Islamic”. Ela o precisava aital: “Islamic vòl dire que qualqu'un agís coma musulman. E vesi pas que siá pròpri de l’islam, çò que fan aqueles terroristas. Doncas, los pòdi pas nomenar «islamics». Prepausi alavetz li dire «pretengut Estat Islamic». Puslèu, los poiriái nomenar «islamistas». O presiqui dempuèi 2014: islamic fa referéncia a las causas que fa un musulman en tant que musulman. Dins lo mond i a 1,5 miliard de musulmans. E quand un musulman se desvia de l’islam, per contra, decidiguèrem li dire «islamista», çò qu'abans se’n disiá «fondamentalista», «integrista», «radical»”. Dins aquel sens, Bremon precisa que las crosadas èran pas crestianas, “e mens encara lo Ku Klux Klan, e mai s’aviá la crotz coma simbòl”.
 
 
 
E qual paga las mosquetas en Occitània?
 
Dins l’estat francés, segon la lei de 1905, la Republica reconeis pas cap de confession religiosa, e doncas, ne subvenciona pas cap. Pasmens, los cònsols de qualques vilas an fach d’esfòrces per sosténer qualques projèctes a causa de la preséncia màger de ciutadans musulmans en finançant d’activitats culturalas d’un sanctuari, una bibliotèca o un salon de tè. Segon de donadas que publiquèt Le Figaro en 2008, “los poders publics contribuisson pel 30% de la construccion de sits de culte”. Mas lo 50% de la bastison de las mosquetas serián finançadas per l’Arabia Saudita.
 
 
Lo wahhabisme o salafisme saudita
 
Al començament dels ans 1960 s’inaugurèt a Brussèlas una mosqueta granda al Pargue del Centenari finançada per l’Arabia Saudita. Es lo centre mai important de difusion de l’ideologia wahhabita en Euròpa.
 
Lo wahhabisme (de l’arabi  الوهابية‎, al wahhābiyya) es un movement fondamentalista qu’es vengut lo sistèma sòciopolitic oficial en vigor en Arabia Saudita. S’agís d’un sistèma religiós extrèmament rigorista, a causa de la cresença del sieu fondador que tot çò qu’apareguèt dins l’islam après las tres primièras generacions a partir del profèta èra innovator e corrompiá la fe. Per tant lo wahhabisme preconiza d’utilizar sonque lo Coran e los Hadits coma font de la religion, e prescindir de tota autra nocion que siá aportada per la tradicion. Se caracteriza tanben per sa volontat d’espandiment e, a l’ora d’ara, a estendut considerablament son influéncia amb la creacion de centres d’estudis e de mosquetas per tot lo Mond, finançats amb l’ajuda de las ressorsas economicas de la dinastia saudita. Tant Al Qaida coma lo pretengut Estat Islamic posan lor font ideologica dins lo wahhabisme, que se coneis tanben jol nom de “salafisme saudita”.
 
Fa tres ans, Wikileaks revelèt l’enòrme chepic del govèrn bèlga per las activitats d’aquela mosqueta. Belgica, de fach, obtenguèt que se cambièsse lo president de la fondacion que la gerissiá, Khalid Alabri, un foncionari saudita que las autoritats europèas identificavan coma un dels principals promotors de las activitats wahhabitas.
 
 
Las relacions sauditas amb França
 
Lo 6 de març passat, lo president francés, François Hollande, decorèt amb la Legion d’Onor lo prince eiretièr saudita Muhammad bin Naif bin Abdulaziz Al Saud. L’acte se faguèt a París en tota discrecion, que l’Elisi ne faguèt pas cap de comunicacion. La decoracion se faguèt “al títol de personalitat estrangièra, una practica protocolària correnta”, segon de fonts governamentalas mençonadas per France TV.
 
L’estat francés a de relacions plan seguidas amb l’Arabia Saudita, dont d’importants contractes de venda d’armas.
 
 
Vacanças en Provença
 
La familha reiala saudita son proprietaris d’una residéncia sus la còsta de Valàuria (Vencenc). Arunan, clausurèron la Plaja de la Mirandòla, que se tròba davant la residéncia dels reis sauditas, qu’es una plaja publica, e se faguèt installar un ascensor per i accedir dirèctament.
 
Lo cònsol de Valàuria refusèt aquel projècte, coma tanben capitèt —amb l’ajuda del prefècte— de far arrestar los trabalhs sauditas per clausurar l’endrech; lo cònsol afirmava que cap d’autorizacion èra pas estada depausada a la comuna. Ça que la, los servicis de l’estat francés, eles, donèron lor acòrdi en tot permetre al rei saudita de far çò que desirava.