“Cossí se pòrta Abdullah Öcalan? Es viu?”, çò se demandan fòrça gents après lo còp d’estat mancat en Turquia. Öcalan, conegut popularament amb l’escaisnom d’Apo (l’oncle), es lo cap que simboliza la lucha del pòble curd. La nuèch del còp d’estat, los putschistas avián una tièra d’objectius marcats: talhar los ponts d’Istambol, ocupar de televisions, bombardar lo parlament… e sequestrar Abdullah Öcalan, segon qualques rumors publicadas pels mèdias turcs, coma lo jornal Cumhuriyet.

Lo Partit de la Democracia Populara (HDP) —lo sol partit prò-curd de l’assemblada de Turquia— exigiguèt la setmana passada qu'un comitat independent vesitèsse Öcalan per avalorar la siá santat. Lo cap curd a 68 ans e ne fa 15 qu'es embarrat dins una preson de l’illa d’İmralı, ont complís sa condemna a perpetuitat per traïson e separatisme.
 
Degun sap pas res d’Öcalan dempuèi abril de 2015, pauc abans del trencament del procès de patz entre lo govèrn turc e lo Partit dels Trabalhadors de Curdistan (PKK). El èra lo principal interlocutor, del costat curd del conflicte. Totun, las autoritats l'isolèron del Mond. La trèva se bricalhèt e la pression sus Curdistan es, dempuèi alavetz, mai violenta que jamai.
 
L’HDP e lo Comitat d’İmralı, un grop que plaideja per la liberacion d’Öcalan, faguèron public un comunicat que disiá que “quin atac que siá de quina sòrta que siá” contra lo cap curd podiá menar Turquia devèrs “una guèrra civila irreversibla”. “La seguretat de sénher Öcalan es pas pas una question banala”, çò precisavan.
 
Òm s’es tanplan organizat dins los rets socials amb l’etiqueta #WeDemand2SeeOcalan (exigissèm de veire Öcalan). D’activistas e de simpatizants demandan d’informacions sus l’estat d’Öcalan.
 

We would destroy a world without Öcalan.#FreeÖcalan#WeDemand2SeeOcalan#WeDemand2SeeOcalanpic.twitter.com/lyz6y1EjZp

— Erdal (@Erdal_Sores) 19 de juliol de 2016

 
 
La prediccion del còp d’estat
 
Lo cap de l’HDP, Selahattin Demirtaş, expliquèt dins una entrevista al jornal Yeni Özgür Politika qu’Öcalan aviá ja predich lo còp d’estat fòrça abans que se passèsse. La rason: Erdoǧan es incapable de resòlvre lo conflicte entre l’estat e los curds. “El avertiguèt fòrça còps Erdoǧan”, çò assegura Demirtaş. Concretament, Öcalan disiá al president: “Se s’acaba lo procès [de patz] s’activarà lo mecanisme e finiràs coma Mursi [lo president egipcian tombat per un còp d’estat en 2013]”. Aquela meteissa prediccion l’aviá explicada Faysal Sarıyıldız, deputat de l’HDP, en una entrevista a Vilaweb.