Milèrs d’aranesi que reclamen aué en ua jornada revendicatiua, esportiua e hestiua, er usatge sociau dera lengua occitan en país de cap de Garona. Se tracte dera 23u edicion dera corsa Aran per sa Lengua, ua manifestacion revendicatiua dens la quau fòrça aranesi trauèrsen era Val, a pè o en tot córrer. Es correires que gessen de Les, de Montgarri o deth Pòrt de Vielha e que s’amassen ath ser ena plaça de Vielha. Aquiu que se i amassen normauments un milèr de persones, e dempús des actes e des discorsi, un brave e animat concèrt de Nadau que claue ua jornada que cada an ven istorica.
 
Aué tot eth país aranés marche des tres punts dera Val entà trapar-se ena plaça de Vielha. Aquiu qu’arribaràn en tot carrejar es terçons, que permeteràn de dessenhar era mapa dera Val ena Plaça dera Glèisa.
 
Era marcha qu’ei organizada peth collectiu Lengua Viua, entà revendicar er usatge sociau der aranés.
 
Era principau hònt de sòs entà finançar er eveniment qu’ei era venda dera camiseta dera corsa, qu’ena edicion d’enguan ei dessenhada per Irene Moreno.
 
Era corsa que compde cada an damb mès compatriòtes de Garona enjós, que vien tanplan a botjar-se peth nòste aranés, qu’ei, fin finau, er occitan de toti.





 

LIVE on #Periscope: Aran x sa lengua https://t.co/k6dAF0teG3

— Mireia Boya Busquet (@yeyaboya) 31 de juliol de 2016