Lo govèrn de Norvègia a confirmat que per lo centenari de l'independéncia finesa, que se celèbra l’an que ven, estúdia de redessenhar la frontièra, per que Finlàndia recépia una montanha que seriá la pus nauta del país. “I a qualques problèmas formals e avèm pas pres encara cap de decision definitiva [...] mas o avèm pres en consideracion”, çò confirmava dimècres passat la primièra ministra de Norvègia, Erna Solberg.
 
La montanha en question es lo mont Hálditšohkka, de 1324 mètres. Se tròba dins lo Cercle Polar Artic e fa partida d’un grop de cimas nomenadas Halti, que la pus nauta, lo Ráisduattarháldi (1365 mètres) es situada a un quilomètre de la frontièra, dins lo territòri norvegian. Ara, se s’aprovèsse aquel cambiament de solament quaranta mètres, la cima del Hálditšohkka  ara dins Norvègia, poiriá venir lo mont pus naut de Finlàndia.
 
Dempuèi 2015, un grop de norvegians aderiguèt a l’idèa del geofisician Bjørn Geirr Harsson e comencèt la campanha per donar la cima del Hálditšohkka a Finlàndia a l'ocasion del centenari de son independéncia. L’idèa es venguda de mai en mai populara fins al ponch que lo govèrn l’a presa en consideracion, e mai se cal cambiar lo tèxte de la Constitucion que definís Norvègia coma un “reialme indivisible e inalienable”.