Qualques fotografias publicadas suls rets socials aqueles darrièrs jorns mòstran d'òmes abilhats amb lo vel acompanhats de lors companhas sens lo vel per protestar contra la lei qu'obliga las femnas iranianas de se cobrir lo pel e lo còl.
 
Après la revolucion de 1979 s'instaurèt la Republica Islamica en aquel país, que demest sas leis, exigís que las femnas iranianas se cobriscan en seguissent un estricte còde vestimentari. Despuèi ençà, de milièrs d’agents del Gashte Ershad susvelhan la moralitat dels ciutadans. Aqueles agents perseguisson los òmes abilhats d’un biais inapropriat o que pòrtan de jòias, e las femnas que cargan pas lo vel o que lo cargan mal, en tot violar la lei islamica de la Republica. “Pòdi pas sortir sens lo vel, manco pas per crompar de pan al mercat qu'ai davant l’ostal”, çò explica Leyla Nuri, una activista de Teheran, çò rapòrta un article d’Amina Husseinpublicat sus Vilaweb.
 
Per luchar contra aquela repression policièra e per protestar, qualques iranianas se talhan lo pel e s’abilhan coma d’òmes per desfisar los agents. Un desenat de femnas publican de fotografias d’elas amb lo pel fòrça cort en se passejant dins de luòcs publics per bravejar la repression del Gashte Ershad.
 
Qualques femnas, en cèrts moments de rebellion, se fan de fotografias sens portar lo vel e las publican sus de sits web o las mandan a d’organizacions que defendon los dreches de las femnas iranianas. L’activista Masih Aleinjad a creat la plataforma My Stealthy Freedom que ten ara mai d’un milion d’usatgièrs sus Facebook e qu’es venguda la votz de las iranianas reprimidas.
 
Segon de chifras d’Amnestia Internacionala, de milions de femnas son punidas cada an amb de multas d’entre 250 e 300 dolars per violar aquel còde. En mai d’aquò, de desenats d’elas son detengudas per publicar de fòtos sens lo vel. Per aquela rason, e per paur d’anar en preson, dins aquesta nòva campanha qualques femnas apareisson d’esquina sus las fotografias.
 
“Totas i volèm participar, mas volèm pas anar en preson. Es malaisit de dirigir de movements de protèsta dins lo país”, çò apond Leyla. “De dreches de la femna se viòlan cada jorn en Iran. Avèm pas cap de libertat”, çò sosten. “I a cada còp mai d'agents per carrièras, mas a l’encòp las protèstas aumentan”, çò precisa.
 
Shadi Sadr, una activista e avocada iraniana, foguèt condemnada a sièis ans de preson per una campanha que reclamava de dreches e de libertat. Sadr poguèt fugir lo país e partir vèrs Londres, ont pòrta pas jamai lo vel. Ailà creèt una organizacion nomenada Justice for Iran que defend los dreches de las femnas a l’estrange.
 
Iran es lo sol país del Mond qu'obliga totas las femnas de se vestir del vel, e mai las estrangièras, a causa de la lei islamica de la Republica. Las ostessas dels avions lo cargan quand intran dins l’espaci aerian iranian.