Aperaquí 30 000 turcs manifestèron dissabte passat per carrièras del centre vila de Colonha (Alemanha) per mostrar lor refús al còp d’estat mancat que lo patiguèt Turquia fa doas setmanas. Los manifestants, que cridavan d'eslogans en favor del president Recep Tayip Erdoğan, marchavan jos lo lèma “Òc per la democracia, non al putsch” e seguissián la crida de l’Union dels Democratas Turcs Europèus, una associacion pròcha de l'AKP, lo partit d’Erdoğan. Pasmens lo govèrn alemand enebiguèt que lo quite Erdoğan, qu’èra a Ankara, parlèsse amb la fola mejançant d’un ecran gigant. Lo ministre dels espòrts turc, Akif Çağatay Kılıç, participèt a la protèsta e exigiguèt puèi d'explicas per la “censura” del messatge d’Erdoğan.
 
Diluns, divèrses mèdias turcs, pròches d’Erdoğan, raportèron la polemica en restacant la cancelièra d’Alemanha, Angela Merkel, amb lo nazisme. Lo gròs títol del jornal Aksam tocant la manifestacion de Colonha èra “Hail Merkel”, e l’illustrava amb un imatge de la cancelièra que fasiá la saludacion nazi. De son costat, lo gròs títol del jornal Takvim  èra “FETÖNAZI”, en referéncia a la sospechada organizacion terrorista dirigida per l'influent miliardari islamista Fethullah Gülen que ne voldriá acabar amb Erdoğan. En mai d’aquò, lo govèrn de Turquia convoquèt diluns un representant de l’ambaissada alemanda per exigir d’explicacions per aver pas permés lo messatge del president.
 
Ara la situacion en Turquia es extrèma. Lo govèrn es a far de purgas demest los opausants e los que son critics amb lo poder. Despuèi la nuèch del còp d’estat an detengut aperaquí 16 000 personas, del temps que los foncionaris multats e licenciats son mai de 50 000. Una de las darrièras mesuras del govèrn turc es de sepelir los putschistas mòrts dins un cementèri “per traites”.