A 7 oras e mièja del matin d’aqueste divendres 5 d’agost, un òme de 26 ans foguèt arrestat per la polícia municipala de Tolosa (Tolosan) per aver comés una agression omofòba dins la carrièra de Sant Roman, entre las plaças del Capitòli e Esquiròl.
 
L’agressor auriá insolentat un parelh d’òmes que tornavan a l’ostal après una nuèch de fèsta dins una discotèca de la carrièra dels Gèstes. Après las insolentariás a prepaus de lor condicion sexuala, l’agressor, de 26 ans e visiblament embriac, auriá tustat una de las victimas fins a la daissar inconscienta per tèrra e ensajat de fugir. La polícia municipala l’arrestèt a pauques mètres del luòc de l’agression e li faguèron un tèst d’alcolemia, que lo resultat foguèt d’1,24 grams d’alcòl dins la sang. L’òme tustèt tanben los policièrs, a un a l’uèlh e a l’autre al genolh, mas, fin finala, foguèt menat al comissariat.
 
 
França, 11n estat d’Euròpa pels dreches del collectiu GSD
 
Segon lo rapòrt d’ILGA (Associacion Internacionala LGTBI) de mai de 2015, l’estat francés es l’onzen país en Euròpa ont se respècta mai los dreches de las personas de genres e sexualitats divèrses (GSD), darrièr lo Reialme Unit, Belgica, Malta, Suècia, Croàcia, Espanha, los Païses Basses, Norvègia, Danemarc e Portugal. ILGA expliquèt los motius d’aquela 11a plaça pel fach que, e mai se l’estat faguèt qualques avançadas, i a de reticéncias fòrtas dins la societat francesa contra lo maridatge egalitari e lo discors de la paur s’escampa dins l’opinion publica.
 
 
Omofobia pertot en Euròpa
 
A Barcelona tanben, ont la lei contra la LGTBI-fobia adoptada pel Parlament de Catalonha en 2014 aplica las sancions mai duras d’Euròpa, se produguèt una autra agression omofòba lo meteis jorn, tanben cap a dos jovenòmes (de 24 e 22 ans) pendent la celebracion del festenal Circuit BCN, que s’adreiça al public LGTBI. Los joves an denonciat l’agression als Mossos d’Esquadra.