Fa ja 29 ans qu’occitans e catalans se retròban lo primièr dimenge d’agost en la tradicionala pojada al Pòrt de Salau, a 2100 mètres d'altitud. Los occitans partisson de Salau (Coseran) e los catalans de la vila catalana d’Esterri d’Àneu. L’amassada, organizada pel CAÒC e per l’ASPIC, es venguda un simbòl d’amistat e de revendicacion nacionala dels dos pòbles vesins. Aquela revendicacion, ongan s’es refortida amb la commemoracion dels dètz ans d’oficialitat de l’occitan en Catalonha e Aran, e a comptat amb la participacion de Mireia Boya, deputada aranesa al Parlament de Catalonha e opinanta de Jornalet.
 
Ongan, lo bèl temps a favorit la participacion, qu’a comptat mai d’800 personas segon Núria Ontiveros, presidenta del CAÒC. Aquò es una participacion recòrd favorida per “una presa de consciéncia màger del moment que sèm a viure e de la situacion de fòrça nacions coma la nòstra”, segon çò qu’explica lo CAÒC dins son comunicat de premsa.
 
Coma totjorn, se faguèt d’actes d’afrairament, d’escambis de produches dels dos terraires, de danças tradicionalas, de discorses de benvenguda, e fin finala s’issèt las bandièras de las doas nacions del temps que lo mond cantavan Se Canta e Els Segadors. Dins los discorses, se parlèt de l’independéncia de Catalonha e Aran, “ua naua republica que serà formada per dus trocets de dues nacions”, çò precisèt Mireia Boya, en fasent referéncia al fach que lo Principat de Catalonha fa partida dels Païses Catalans e qu’Aran fa partida d’Occitània. Del costat de l’ASPIC, la portavotz de l’associacion coseranesa remarquèt l’importància que la nòva region fruch de la fusion de Lengadòc-Rosselhon e de Miègjorn-Pirenèus se nomene “Occitània”. Ara, lo CAÒC e l’ASPIC se meton al trabalh per festejar l’an que ven lo 30n anniversari de l’eveniment.
 
L’emplaçament d’aquel pòrt es simbolic: s’agís d’un camin natural entre Occitània e Catalonha qu’a servit istoricament per connectar los dos pòbles.
 
Per arribar al pòrt, als occitans lor cal caminar tres oras del temps que los catalans sonque marchan 45 minutas. Es per aquò que tradicionalament los occitans i pòrtan lo formatge e los catalans lo vin.
 
 
Collòqui suls dètz ans d’oficialitat de l’occitan en Catalonha
 
Abans la pojada al pòrt, del costat catalan se tenguèt dissabte, a Esterri d’Àneu, un collòqui interessant menat per Mireia Boya e Marçal Girbau suls dètz ans d’oficialitat de l’occitan, amb una remarcabla participacion del public que faguèt d’apòrts nombroses e interessantas. De soslinhar lo planh general devèrs lo govèrn de Catalonha que deuriá tractar l’occitan coma las autras lengas oficialas e o fa pas. Tanben se destaquèt lo besonh que la societat catalana prenga consciéncia de l’existéncia e de l’oficialitat de l’occitan, qu’es tanben una lenga del país.
 
En mai d’aquò, se tenguèt una projeccion del documentari Aqueth dia i auie ua nòça, que reviu l'invasion mancada de la Val d’Aran pels maquises en 1944 amb la tòca de tombar lo regim de Franco.