Cada an, en agost, la Tèrra se sarra de l’orbita de la cometa 109P/Swift-Tuttle. Los impactes de las particulas en suspension liberadas per la cometa tòcan l’atmosfèra de la Tèrra en causant la pluèja d’estelas mai coneguda, que dimenge passat presentàvem dins un article de Griselda Lozano, çò es las Perseïdas o Lagremas de Sant Laurenç. Los astronòms preveson que l’activitat maximala de meteòrs serà lo matin de divendres 12 d’agost, e per tant que las melhoras oras per observar aquela pluèja d’estelas seràn dins la nuèch de dijòus a divendres que venon. La prediccion per aquela nuèch es de dos cents fins a cinc cents meteòrs per ora, çò es mai del doble de son taus normal.
 
La recomandacion per gaudir de las Perseïdas es de cercar un endrech sens pollucion luminosa e de se cobrir pel passar la nuèch. Se pòt veire melhor las estelas que tomban se lo cèl es fòrça negre. E mai se lo moment d’activitat maximala serà dins la nuèch de dijòus a divendres, se veirà tanben las pluèjas d’estelas dins las nuèches precedentas e posterioras.
 
 
Observar l’estela Algòl
 
Aquela pluèja d’estelas se nomena Perseïdas en referéncia a son ponch d’origina aparent dins lo cèl, qu’es la constellacion de Persèu.
 
Una de las estelas mai brilhantas d’aquela constellacion es Algòl, un sistèma binari que resulta de l’eclipsi mutual de doas estelas que viran una a l’entorn de l’autra amb lo plan orbital orientat devèrs la Tèrra. Aquelas estelas s’eclipsan a d’intervals regulars, e per aquela rason cada 2,87 jorns vesèm que lor luminositat s'amendrís fòrça durant dètz oras. Se tornarà passar lo 12 d’agost que ven, a partir de 3h34 del matin.
 
 
Se pòt veire quatre planetas a uèlh nud
 
Pendent tot lo mes d’agost es possible d’observar totas las planetas visiblas a uèlh nud, çò es Venus, Jupitèr, Mercuri, Mart e Saturne. Ne podètz trobar mai d’informacions sul blòg de l’astronòm catalan Enric Marco.