L’associacion de l’Union dels professionals del sabon de Marselha vòl obtenir una proteccion per lor sabon, via l’obtencion d’una Indicacion Geografica Protegida (IGP). Lo conegut sabon de Marselha, qu'es de bon crompar dins totes los comèrcis del país, proven majoritàriament de l’estrange, segon çò que rapòrta Nice Matin. En Euròpa se produtz de mens en mens per de rasons ecologicas, e las societats installan lors usinas endacòm mai en emplegant de matèrias primièras economicas.
 
Los sabonaires marselheses deploran, d’un costat, que lor saber-far siá pas transmés, e de l’autre remembran que lo veritable sabon de Marselha deu èsser fabricat dins lo País Marselhés, al “pairòu” tradicional amb d’òlis vegetals exclusivament e sens parfum, sens colorant e ni conservador.
 
A l’ora d’ara, lo sabon de Marselha existís pas juridicament e es pas protegit, e los metòdes de produccion se respèctan pas.
 
 
Collectiu Made in Provence
 
En decembre de 2012, se lancèt una peticion en linha per salvar lo sabon de Marselha e empedir la barradura de “Fer à Cheval” (Fèrre de Chivau), una de las darrièras sabonariás marselhesas. Qualques meses pus tard, gràcias a las mai de 21 000 signaturas, l’usina foguèt salvada e se votèt al Parlament francés una procedura de creacion d’IGP pel sabon de Marselha. A l’ora d’ara n’amassa aperaquí 124 000 e encara se pòt signar.
 
Pel moment, l’INPI es a dobrir una enquèsta publica per definir lo contengut de l’IGP, e los sabonaires marselheses demandan que los ciutadans prengan part al procès, per tal de “perpetuar l’eiretatge de l’autentic sabon de Marselha e de sostenir lei tradicionalas sabonariás provençalas”.
 
Per tot aquò an creat lo collectiu Made in Provence que podètz seguir sus Facebook e sus Twitter.