Aperaquí 46 milions de personas dins tot lo Mond vivon en situacion d’esclavatge, en trabalhant sustot dins d’usinas, de minas, de bòrias... Lo 60% dels païses del Mond presentan un naut risc d’utilizar aquel esclavatge coma part de lors cadenas de produccion, segon un rapòrt que ven de publicar l’associacion pròdreches umans Walk Free Foundation.
 
Lo taus d’esclavatge global met en evidéncia que lo trafec de las personas per las esplechar sexualament o la somission al servatge per reglar de deutes, son de problèmas fondamentals a l’ora de luchar contra l’esclavatge modèrne.
 
La societat Verisk Maplecroft, qu'a analizat la situacion dins 198 païses, a observat que 115 païses se tròban en risc extrèm d'aver d’obrièrs en condicion d’esclavatge. “Pauques païses dins lo Mond son a l’abric de l’esclavatge modèrn”, çò precisèt Alex Channer, analista de Verisk Maplecroft.
 
Channer soslinhèt que la tòca del rapòrt sus l’esclavatge es d’ajudar las entrepresas a identificar aqueles luòcs ont i a lo risc mai naut d’esclavatge. En 2015, lo Reialme Unit aprovèt una lei contra l’esclavatge qu'exigís de las societats qu’ajan una chifra d’afars superiora a 36 milions de liuras esterlinas (aperaquí 42 milions d’èuros) e que rapòrten las mesuras que prenon per la deteccion e l’eradicacion de l’esclavatge dins lors cadenas de produccion.
 
Lo rapòrt soslinha que de païses coma lo Sodan del Sud, la Republica Democratica de Còngo (RDC) —un dels mai grands productors d’aparelhs electronics— e Sodan son los luòcs que presentan lo nombre pus grand d’esclaus. Demest los païses amb un naut risc d’albergar l’esclavisme se tròba Índia, China e la Còsta d’Evòri.
 
L'Union Europèa presenta un “risc mejan” d’utilizar d'esclaus, del temps qu'Alemanha, Finlàndia, Danemarc e lo Reialme Unit son los païses amb lo risc mai bas d’Euròpa. “En general, la majoritat dels païses presentan un bon quadre legal en aquel afar, lo problèma es la corrècta aplicacion d’aquelas leis”, çò afortiguèt Channer.