Lo cònsol màger de Canas, David Lisnard, s’apond a la polemica del burkini. E mai se cap de burkini es pas estat vist sus las plajas de la vila, lo cònsol màger de la vila vencenca a enebit lo pòrt d’aquel vestit de banh sus las plajas.
 
Lo tèxt publicat per Lisnard, del partit drechista LR, dispausa que “l’accès ai plajas e a la banhada son interdichs a comptar de la signatura dau present arrestat fins au 31 d’agost 2016, a tota persona qu’aga pas una tenguda correcta, respectuosa dei bònei mors e de la laïcitat, e que respècte lei règlas d’igièna e de seguretat dei banhadas adaptadas au domeni public maritim”. En mai d’aquò, l’arrestat municipal apond que “lo pòrt de vestits pendent la banhada qu’agan una connotacion contrària a aquelei principis es egalament interdich”. En mai d’aquò especifica que las infraccions seràn punidas amb de multas de primièra categoria, çò es 38 èuros, segon l’AFP.
 
 
Burkini e terrorisme
 
L’arrestat es escrich amb la tòca d’enebir lo burkini. L’arrestat, de mai, especifica qu’”una tenguda de plaja que manifèste de maniera ostentatòria una apartenença religiosa, dau temps que França e lei luòcs de culte religiós son actualament la buta d’atacas terroristas, es de natura a crear de riscas de trebles a l’òrdre public (atropaments, batèstas, etc.) qu'es necessari de prevenir".
 
“S’agís pas d’interdire lo pòrt de signes religiós a la plaja, mai lei tengudas ostentatòrias que fan referéncia a una aleujança a de movements terroristas que nos fan la guèrra”, çò precisèt a BFMTV lo director general dels servicis de la vila de Canas, Thierry Migoule. Pasmens, Migoule precisèt a la cadena de television que cap de burkini es pas estat observat sus las plajas de Canas.
 
 
Reaccions sus Twitter
 
De son costat, la secretària generala de la Federacion dei Musulmans dau Sud, Feiza Ben Mohamed, a reagit sus Twitter. D’en primièr Ben Mohamed cresiá que s’agissiá d’un fake o d’una informacion falsa amb la tòca de fomentar l’islamofobia. Puèi, en remarcar que se tracta d’una informacion veraia, l’activista remembra sus son compte de Twitter que lo pòrt del burkini es pas enebit per la lei francesa; exigís que se faga respectar las libertats dins l’estat francés e prepausa d’ajuda legala e de presentar una denóncia al Tribunal Administratiu per totas las personas verbalizadas per portar l'hijab o la kippa.
De son costat, l’Observatòri de la laïcitat a especificat que las “restriccions vestimentàrias [...] se pòdon pas fondar sul principi de la laïcitat”.
 
 
Lo burkini
 
Lo burkini es un vestit de banh que mòstra solament la cara e los pès. Es semblable a una combinason de cabussada, mas es fach de materials textils. Aqueste vestit de banh, que son nom deriva dels  mots “burqa” e “bikini”, lo creèt una dessenhaira australiana musulmana nomenada Aheda Zanetti, per la societat Ahiida que n’a la marca depausada. Ahiida promòu lo burkini coma la solucion perfiècha pel banh public de las femnas musulmanas mai tradicionalistas, mas dins l’estat francés lo burkini es enebit per la lei dins las piscinas publicas, en aplicacion de las “règlas d’igièna”.