L’Escòla Occitana d’Estiu (EOE) es una setmana de convivéncia dins una residéncia que fa d’escòla e de lotjament a l’encòp, a Vilanuèva d’Òlt (Naut Agenés). Tot se fa solament en occitan: l’EOE es doncas una bona escasença de far d’immersion lingüistica.

Comença uèi a Vilanuèva d’Òlt (Naut Agenés) la 42a edicion de l’Escòla Occitana d’Estiu, un eveniment màger per la transmission e la mantenença de la nòstra lenga e cultura que prepausa fins al 20 d’agost de corses de lenga occitana dins totes los nivèls e dialèctes e tota una tièra d’activitats: d'obradors, de conferéncias, d’espectacles, de danças, de descobèrtas del terraire e una librariá completa de libres en lenga nòstra.
 
De soslinhar l’estagi de cant tradicional animat per Pèire Boissièra e una formacion pels animators entitolada “Aquesir e desvolopar competéncias e otisses d’animacion en lenga e cultura occitanas”.
 
Los participants son normalament d’occitans que venon de pertot dins lo país, seguits per un grop de catalans plan nombroses. Al delà, i a de mond de païses ben divèrses.
 
A l’EOE i a de mond de totes los atges, çò que fa que los escambis entre dialèctes e generacions son passionants, mai que mai en tot beure un còp a l’estanquet, a la fin de la jornada, abans lo balèti o l’espectacle.
 
Pels mai pichons i a l’Escoleta, amb d’activitats per enfants de 5 a 10 ans, e per lo jovent d’11 a 16 ans i a l’Escòla dels Adolescents (dicha “Escòl’Adòs”).
 
Coma d’abitud, lo Comitat d’Afrairament Occitanocatalan (CAÒC) i serà, en tot portar fòrça participants. Lo CAÒC collabòra activament a l’organizacion de l’EOE en menant, de mai, de professors de catalan e lo musician Joan Codina per animar la fèsta occitanocatalana. Las autras animacions en serada seràn lo bal carcinòl del duo Abela-Vidal e lo grop “DuoBois convida Carolina Dufau”.
 
 
Molière d’Òc
 
Dimècres se debanarà una serada de teatre a La Ròca. Lo grop de teatre La Rampe-TIO representarà Molière d’Òc, una engenhosa adaptacion de Molière a la faiçon occitana escricha per Marcèu Esquieu, defuntat l'an passat e que creèt l'EOE.
 
L’òbra d’Esquieu es qu’una adaptacion a l’occitan d’una pèça de Molière, Monsieur de Pourceaugnac. Dins l’istòria originala, Sénher Porcenhac es un gentilòme lemosin que se’n va a París per se maridar amb Julie, la filha d’un gentilòme parisenc. Es lo paire qu’a decidit aquel maridatge, e mai se Julie es amorosa del jove Erast. Mas Julie, Erast e la serviciala metràn en plaça un estratagèma per desvalorizar l’òme lemosin e lo convéncer de fugir. Molière aprofiècha aquela situacion per i metre de scènas dramaticas e comicas ont denóncia la sufisença dels mètges e de las gents de París. Es tanben una pèça comica que ridiculiza los arquetipes diches “provincials” que, segon los parisencs, los aurián los occitans.
 
Amb l’adaptacion occitana, La Rampe-TIO invèrsa la situacion. L’istòria se passa dins una vila d’Occitània e Monsieur de Pourceaugny, un ric gentilòme parisenc, i ven per se maridar amb Julie. Aquí l’òbra se debana en occitan, e mai se Pourceaugny parla un francés plan ponchut. Se tracta d’una pèça per s’estraçar del rire qu’apond una valor sociala e umana e qu’interpèla la nòstra societat d’uèi.