Boko Haram publiquèt dimenge passat un nòu vidèo ont i apareisson de nombrosas dròllas de las mai de 300 que raubèron en abril de 2014 a la vila nigeriana de Chibok. Dins lo document, las joventas demandan al govèrn de Nigèria que faga un esfòrç per las liberar.
 
“Avèm talent, morissèm”, çò ditz una de las joventas, que demanda en nom del grop a lors familhas que parlen amb lo govèrn nigerian per que se reünisca amb Boko Haram e qu'elas pòscan “tornar a l'ostal”.
 
Dins lo vidèo, d’11 minutas de durada, un milician de Boko Haram abilhat amb l’unifòrme militar e la cara cobèrta, obliga una de las drolletas d'explicar que los atacs aerians del govèrn nigerian an tuat de desenats de companhas siás. La pròva la porgisson a la fin del vidèo, ont mòstran qualques images de cadavres que, supausadament, son de qualques joventas.
 
Lo meteis milician avertís las autoritats nigerianas qu'ensagen pas de secórrer aquelas joventas per la fòrça. “Se cresètz qu'avètz la fòrça e la capacitat, venètz liberar las dròllas… e nosautres vos mostrarem çò que sèm capables de far”, çò dison segon la traduccion publicada pel jornal nacional Daily Post.