Lo conselh executiu de las Illas Malvinas (o Illas Falkland, en anglés) aprovèt lo 29 d’agost de convocar un referendum en març de 2013 sus la sobeiranetat de l’archipèla, per “resòlver la question de l’estatut politic”.

La comission electorala del Reialme Unit, segon lo conselh, ajudarà al desvolopament e a la formulacion de la question que se sometrà a consulta. “Las votacions se faràn en març de 2013 e lo jorn exacte, lo determinarà lo cap de l’executiu, Keit Padgett, en acòrdi amb los membres de l’assemblada legislativa”, çò ditz un comunicat del conselh. L’intencion, segon Padgett, “es de mandar un messatge a la comunautat internacionala”.
 
Al referendum, i poiràn participar los abitants majors de18 ans que residiscan legalament dins las illas. “Un còp que seràn verificats los vòtes, las bilhetas de totas las circonscripcions se mesclaràn e lo resultat s’anonciarà coma un vòte de tota l’illa”, çò detalha la nòta.
 
Argentina reclama al Reialme Unit la sobeiranetat d’aquelas illas annexadas en 1833. En 1982, los dos païses faguèron una guèrra per l’archipèla, çò que causèt la mòrt de 649 militars argentins, de 255 militars britanics e de tres civils.