La vila de Riòm de las Montanhas, als Monts de Cantal, celebrèt aquesta dimenjada  la fèsta del formatge Blau d’Auvèrnhe. Demest lo desenat de fabricants e los quatre productors fermièrs, an distinguit las Formatjariás Occitanas de Sant Flor (Planesa). Aquela societat, que realiza almens la mitat de sa produccion dins un ancian tunèl ferroviari del país de Planesa, es al cap de la produccion de formatge Blau d’Auvèrnhe amb una produccion totala de 2500 tonas, segon çò que rapòrta La Montagne .
 
“Es un produit de caractèr, dau perfum plan equilibrat”, çò declara Denis Flagel, director del sit de las Fromatjariás occitanas. Fabricant egalament de la forma d’Embèrt, del cairat d’Orlhac (Carré d’Aurillac) e del blau de Sant Flor, Flagel nòta: “Lo blau d’Auvèrnhe gropís mentre que d’autres produits de pasta peiressilhada, coma la forma d’Embèrt, evolucionan e veson la demanda aumentar”. “Mas per quinas rasons?” çò demanda Manuel Cladière, jornalista de La Montagne a Flagel que precisa: “Lo produit es pas pro valorizat e reconegut per los consumaires. Quauques uns prenon un formatge e pensan qu’es un blau d’Auvèrnhe, mas aquò es pas lo cas”.
 
“Lo sector es motivat per far reconéisser e valorizar lo blau d’Auvèrnhe, que son refinament es de vint e ueit jorns aumens. Mas quò es a sèt setmanas que balha son pus naut” . Per evolucionar “chal un trabalh de tots los actors. Coma menaires, devèm èsser maitot dins aquela posicion per l’evolucion dau blau d’Auvèrnhe. Nos chal donar una impulsion. La forma d’Embèrt a reüssit a se far reconéisser. La mesma chausa es possibla per lo blau d’Auvèrnhe”.
 
La societat, basada a Tolosa e nomenada oficialament en francés “Les Fromageries Occitanes” foguèt creada en 1994 e a de sits de fabricacion en Auvèrnhe, Gasconha, Lengadòc e Roergue: Lanobre (Artensa), Talisat (Planesa), Sant Flor (Planesa), Sant Mamet e La Salvetat (Castanhau), Lons (Bearn), Vathmala (Coserans), Vilafranca de Lauragués (Lauragués), Lo Malasiu (Marjarida), Ròcafòrt (Larzac).