Lo president de las Filipinas, Rodrigo Duterte, a menaçat de retirar son país de l’ÒNU e de prepausar a China de formar una autra organizacion internacionala amb lo sosten de qualques païses africans.
 
Duterte a criticat l’ÒNU a causa d’un rapòrt qu’a fach sonar las alarmas internacionalas pr’amor que lo govèrn de Duterte tolèra e encoratja d’execucions extrajudiciàrias de narcotrafegants. Dempuèi l’eleccion de Duterte en mai passat coma nòu president de las Filipinas, i a agut ja mai de 900 mòrts dins la lucha qu’aquel nòu govèrn filipin a entamenada contra la dròga.
 
Duterte anoncièt qu’implantariá la pena capitala contra lo trafec de las drògas, que per el es ara la politica prioritària del govèrn. Mas l’ÒNU considèra que lo president encoratja e tolèra l’accion dels comandos de la mòrt qu’executan per lor compte de personas restacadas al narcotrafec. S’estima que lo nombre de mòrts per aquel metòde es ara de 900 personas, dempuèi l’eleccion del nòu president.
 
Duterte a qualificat d’”estupides” los juristas que lo critican.
 
 
Una campanha illegala
 
Duterte a confirmat en plusors escasenças que los procèsses judiciaris legals an pas res a veire amb el, çò raportava Christian Andreu sus Jornalet l’11 d’agost passat. “I aurà pas de procèsses ni d’avocats”, çò diguèt. La sola causa importanta per Duterte a l’ora d’ara es la reconeissença del pòble filipin qu'a votat per el. Tota la rèsta es pas brica importanta. E tocant las criticas dels autres politicians, diguèt tanben que se’n trufava.
 
Tot aquò a respècte de la pandemia que, segon Duterte, patisson las Filipinas amb la dròga. Segon de donadas de l’Agéncia Contra la Dròga filipina, se crei qu’un 3% de la populacion consuma de dròga e qu’aperaquí lo 92% dels vilatges de l’airal metropolitan filipin “ne son estats contaminats”. Tot aquò amassariá una chifra totala de mai de 600 000 personas, segon çò que rapòrtan las agéncias occidentalas d’informacions, que vendon e que crompan de dròga a las Filipinas.
 
Lo president filipin, quand èra fa qualques annadas lo cònsol màger de la vila de Davao, aviá ordenat a aquela epòca als policièrs d’agir lèu e de tirar per tuar los suspèctes de trafec de dròga. “Ieu meteis diguèri als policièrs de s’inquietar pas après aver tuat un trafegant. Aquò deu èsser pas cap de problèma pels policièrs. Una campanha illegala? Es pas vertat. Es justa e morala”, çò diguèt Duterte, "Aquò es pas e a pas d’èsser brica un problèma pels policièrs.”
 
Pendent lo sol mes d’agost son estats tuats mai de 400 suspèctes de trafec de dròga per la polícia o per las milícias privadas. E mai de 600 000 personas son estadas arrestadas. Tanben lo president del Senat filipin a demandat mai de garentias dins aquela sòrta de procèsses e pas tanta violéncia. Mas per ara Duterte escota pas.