Actualitats
Desmond Tutu vòl que lo Tribunal Penal Internacional jutge Bush e Blair
Dins un article al jornal anglés The Observer, lo prèmi Nobel de la patz demanda que sián jutjats per las consequéncias de l’invasion d’Iraq
Lo prèmi Nobel de la patz sud-african, Desmond Tutu, a demandat que l’èx-president dels Estats Units, George W. Bush, e l’èx-primièr ministre britanic, Tony Blair, respondan al Tribunal Penal Internacional (TPI) de las consequéncias de l’invasion d’Iraq en 2003. Dins un article al jornal anglés The Observer, Tutu condemna “l’immoralitat” de l’invasion perque se basava sus “l’engana” pretendent qu’en Iraq i aviá d’armas de destruccion massissa, e argumenta que lo conflicte provoquèt un nombre de mòrts talament naut que los dos èx-dirigents meritan de comparéisser al tribunal de L’Aia, coma s’es passat tanplan per de motius semblables amb d’autres caps d’estat.
“Los dirigents d’alavetz dels Estats Units e del Reialme Unit s’inventèron lo scenari ont venguèron de fanfarons d’escòla e amb lo qual nos dividiguèron. Nos an portat al lindal del precipici ont sèm, amb l’espèctre d’Iran e Siria davant nosautres”, çò ditz.
Lo religiós remembra que dins lo conflicte, son mòrts mai de 110_000 iraquians e 4500 soldats estatsunidencs pendent lo remplaçament del regim de Saddam Husayn: “Lo còst de la decision d’eliminar l’assassin —e, solide, lo dirigent iraquian despotic— es estat atròç, en començant pel quite país.”
Tutu considèra que se foguèsson jutjats, s’eliminariá lo polemic deficit qu’afècta los procèsses dobèrts al TPI, ont semblan excluses los dirigents occidentals. “Dins un mond coerent, los responsables d’aquel patiment e d’aquela pèrda de vidas umanas deurián percórrer lo meteis camin que los sieus companhs africans e asiatics, que son obligats de respondre per las lors accions a L’Aia.”
“Lo comandament e la moralitat son indivisibles. Los bons dirigents gardan la moralitat. La question es pas se Saddam Husayn èra bon o marrit, ni quant de mond de son pòble chaplèt. La question es que Sénher Bush e Sénher Blair se serián pas jamai deguts abaissar al nivèl de la siá immoralitat”, çò apond.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 I manque Aznar, qu'ei tanben culpable!
E se i ajustam totes los membres encara vius e actius de las ancianas dictaturas europèas al sègle XX, de mond, te'n farà mai encara… non ?
Totes los arganhòls americans e totes los ligats a l'OTAN que, d'un biais o d'un autre, contribuïguèron a establir o restablir republicas bananièras o dictaturas en America Latina al sègle XX devon passar al TPI de La Haye sens que se'n manque un. Cada membre de la CIA i dèu passar, pel sieu sosten "logistic" a aquelas fòrças antidemocraticas establidas per fòrça subre pòbles inocents que sonque volián melhorar son viure quotidian. Tota l'escòla financiarista de Chicago, maire del neliberalisme mondialista actual, a mand d'executar los biotòps e las democracias amb sa politica antidemocratica per tota la planèra del temps qu'escrivi aquel mot d'umor, i devon passar tanben. De tira… E puèi, totes los membres decideires, politics e exectius, dels ancians païses pretenduts comunistas — e que , comunistas, o venguèron pas jamai, estant que demorèron sonque dictatorials, ni res mai —, aqueles tanben s'i devon retrobar, davant lo TPI. Va far mond, non ?
Que Bush e Blair sián acusats d'aver enfarlabicats lo planèta es vertat.
Pr'aquò i agèt mantuns filtres per que poguèsson agir: lo parlament britanic e la cambra dels representants dels EUA que lor an balhat las finanças per poder envasir Iraq. Son doncas los representants democraticament elegits d'aqueles dos estats que son responsables.
Es lo triste jòc e lo triste limit de la democràcia: los representants pòdon èsser traïdors vertadièrs dels electors en tot prendre decisions que son pas las décisions del pòble sobeiran.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari