An assassinat l’activista transexuala turca, Hande Kader, a 23 ans. Lo 12 d’agost passat trobèron son còrs violat, mutilat e cremat al bòrd d’una estrada del luxós quartièr Zekeriyaköy d’Istambol. La joventa èra una trabalhaira del sèxe e aviá desaparegut una setmana abans. La vegèron pel darrièr còp quand intrava dins la veitura d’un client, çò rapòrta la BBC.
 
Hande Kader se faguèt conéisser dins tot lo Mond pendent la manifestacion pels dreches LGBT 2005, que foguèt reprimida durament per la polícia. Ela se quilhèt davant los policièrs armats de canons d’aiga, de gases lacrimogèns e de balas de cauchó. Dins lo vidèo que seguís òm pòt veire cossí lança amb ràbia sa sabata contra un camion que reprimís los manifestaires. Son imatge amb sa cara de desolacion virèt dins tot lo Mond gràcias a las fòtos de l’AFP e de Reuters.
 
Ara, pel moment, las autoritats localas se son pas prononciadas sus la mòrt de l’activista turca, mas segon los principals mèdias que rapòrtan la trista nòva, se tractariá d’un crime d’òdi.
 
La mòrt de Kader es arribada mens de doas setmanas après l’assassinat d’un refugiat sirian omosexual, que trobèron mutilat pas tròp luenh d’aquí ont trobèron lo cadavre de l’activista transexuala. Dempuèi 2008, Turquia compta aperaquí 1993 assassinats omofòbs e transfòbs, segon çò que rapòrta l’agéncia turca d’informacions Bianet.