Lo primièr ministre libian, Fayez  As Sarraj, a demandat als Estats Units una ajuda militara encara mai granda en Libia, mentre qu’ara bombardan la vila de Sirta, per poder donar mai de sosten a las fòrças libianas que i luchan contra l’autoproclamat Estat Islamic (EI). La demanda la confirmèt la setmana passada lo comandament militar estatsunidenc per Africa.
 
La peticion se faguèt pendent la vesita del president libian a Stuttgart (Alemanha) e vòl mostrar lo desir del govèrn libian de veire los Estats Units, e tanben lors aliats, ajudar encara mai aquel país african.  L’ajuda deu consistir, segon lo quite primièr ministre libian, en una mai granda formacion dels militars e tanben en un partatge d’informacions pus grand, çò confirma Africom, la Mission dels Estats Units en Africa.
 
En mai d’aquò, lo pòrtavotz estatsunidenc en Libia, Jonathan Winer, a confirmat lo sosten total del govèrn estatsunidenc al govèrn libian e a sa lucha contra l'Estat Islamic. Per aquela rason assolidèt que recebrián "totjorn mai d’ajuda per cochar  los jihadistas del nòrd e del centre de Libia e tanben de la vila de Sirta amb l’apièja dirècta dels soldats estatsunidencs dempuèi lo primièr d’agost d’ongan”, çò rapòrta Africom.
 
Pendent la vesita de Fayez As Sarraj a Stuttgart comencèron de convèrsas amb los representants estatsunidencs per parlar de l'avenidor de Libia un còp liberada la vila de Sirta, çò assegura lo meteis comunicat d’Africom. Sirta, que foguèt la vila natala de Muammar Al Qadhdhafi, tombèt a las mans de l’EI en junh de 2015.
 
 
La lucha per Sirta contunha
 
La comunautat internacionala s’espantèt de la presa de Sirta pels jihadistas, pr’amor que l’EI aviá una basa d’operacions en tèrras africanas qu’encara èra mai prèp d’Euròpa —solament a 300 quilomètres—. Per aquela rason, e amb l’ajuda de las tropas estatsunidencas, dempuèi aqueste mes d’agost lo govèrn libian a lançat una ataca contra aquela vila, per la liberar d’EI. La batalha comencèt en mai d’ongan e es pas encara acabada, En junh, ja avián pogut intrar dins la vila mas la batalha es venguda de mai en mai atròça, amb de combats ostal per ostal a causa de las atacas jihadistas. .
 
Per aquela rason, lo govèrn libian a demandat, e demanda tornarmai, mai d’ajuda als Estats Units. Dempuèi lo primièr d’agost, l’ajuda aeriana estatsunidenca auriá permés de liberar una granda partida del centre de Sirta en tot far recular los jihadistas d’EI devèrs un quartièr residencial situat près de la mar.
 
 
 
 
Christian Andreu