Una bomba espetèt a l’Institut Estatal de Criminologia (dison "Nacional") de Belgica, a Neder-Over-Heembeek (Flandra), dins la nuèch de dimenge a diluns. I aviá pas degun sus lo sit en aquela ora e l’explosion causèt pas cap de ferit.
 
A tres oras del matin, una veitura sautèt las barrièras de l’encencha e lancèt un engenh explosiu que causèt de nombroses damatges, en calcinant qualques salas. Segon una font policièra, mençonada per Le Parisien, “tot aquò demòstra qu’aquelas gents sabián çò que fasián e çò qu’avián per objectiu”. L’Institut de Criminologia depend del Ministèri de la Justícia bèlga e a la carga de las enquèstas medicolegalas dels afars penals.
 
Lo ministèri public de Brussèlas a refusat de dire se las salas damatjadas son de laboratòris d’expertesas tecnicas o ben de salas d’estudi que servisson a l’analisi del drech penal. Segon qualques mèdias locals, que mençonan lo testimoniatge de plusors membres del personal de l’institut, son destruchas las salas tecnicas del servici de criminalistica. Es dins aquelas salas que se somet a expertesa los mòdes operatòris e las pròvas.
 
 
Cinc personas foguèron arrestadas dins la nuèch a l'entorn del laboratòri, mas qualques oras puèi foguèron mesas en libertat, pr’amor que res permetiá pas de las metre en causa.
 
Après los atemptats contra l’aeropòrt e lo mètro de Brussèlas, que causèron 32 victimas, las autoritats tenon lo nivèl maximal d’alèrta antiterrorista. Totun, la polícia bèlga a pas encara dich qui poiriá èsser l’autor de l’atac. L’enquèsta en cors se va servir dels imatges de las camèras de videosusvelhança. 
 
 

Alerte/ Belgique : Attaque à la bombe cette nuit à l'Institut national de criminologie à Neder-Over-Heembeek pic.twitter.com/GTBE7CAzVM

— Geoffrey Henriot (@HenriotGeoffrey) 29 d’agost de 2016