La Caminada Obrièra d’Andalosia, que lo Sindicat Andalós dels Trabalhadors (SAT) l’organiza contra la politica espanhòla de reduccions budgetàrias e contra la situacion generala derivada de la crisi economica, arribèt diluns passat a Granada. I foguèt aculhida per mai de 10 000 personas, que percorreguèron amassa las principalas carrièras de la vila.

Los caminaires demandavan, basicament, la derogacion de las reduccions budgetàrias e de las reformas del trabalh, lo cessament de las expulsions de l’abitança de las personas amb de difucultats per pagar, e mai disián que n’i a pro amb los licenciaments. Al delà, se demandava la cession de las tèrras publicas als païsans per que las trabalhen e que lo deute de las bancas siá pagat per las bancas: “cal pas cargar lo pòble amb aquela responsabilitat”.
 
“Las caminadas son a desvelhar las consciéncias de plan de mond perque rendon evidentas las causas marridas que fa lo govèrn espanhòl. La populacion s’avisa que la crisi es qu’una fraudariá, qu’utiliza los poders per raubar los paures e donar als banquièrs”, çò diguèt un representant del sindicat.
 
La caminada foguèt totjorn escortada per una quantitat desproporcionada de policièrs que susvelhavan los comèrcis. Ça que la los trabalhadors capitèron d’ocupar una botiga Zara, qu’i despleguèron una bandieròla denonciant los abuses d’aquela entrepresa contra los dreches dels trabalhadors. “Lo proprietari de Zara es l’òme mai ric de l’Estat espanhòl”, explicava un representant del SAT, del temps que denonciava que l’entrepresa èra ja estada atacada dins qualques païses per mancar lo drech del trabalh.
 
L’accion dins Granada acabèt amb de milièrs de personas, ponh auçat, cantant l’imne d’Andalosia Pels pòbles e l’umanitat (en luòc de l’expression oficializada Per Espanha e l’umanitat).
 
La darrièra estapa d’aquela caminada de protèsta se debanarà a Almeria, ont an previst d’arribar los 13 e 14 de setembre.