La polemica del burkini es arribada a l’ÒNU. Lo pòrtavotz del Naut Comissariat de las Nacions Unidas als Dreches de l’Òme, Rupert Colville, saludèt ièr dimars la decision del Conselh d’Estat francés de se prononciar contra l’enebicion del burkini a Vilanòva Lobet (Vencenc). En mai d’aquò, Colville sollicita de “totas las autoritats localas qu’an adoptat d’interdiccions similaras, que las daissen sens efièch” immediatament en luòc de profechar de la limitada portada geografica del jutjament”.
 
Net e clar, lo pòrtavotz dels dreches umans de l’ÒNU afirmèt que los arrestats preses contra aquela tenguda vestimentària alimentavan “l’estigmatizacion” dels musulmans. “Aqueles decrets melhoran pas la situacion securitària; tendon, al contrari, a alimentar l’intolerància religiosa e l’estigmatizacion de las personas de confession musulmana en Franca, en particular las femnas”, çò afirmèt. “Los còdes vestimentaris, tals que los decrets antiburkini, afèctan de manièra desproporcionada las femnas e las filhas e sapan lor autonomia en negant lor aptitud a prene de decisions independentas sus lor manièra de se vestir”, çò jutgèt.
 
Lo Conselh d’Estat francés se prononcièt divendres contra l’enebicion del burkini. La Liga dels Dreches de l’Òme (LDH) e lo Comitat Contra l’Islamofobia en França (CCIF) avián sasit la pus nauta de las jurisdiccions de l'òrdre administratiu contra l’arrestat de Vilanòva Lobet (Vencenc). La decision de principi deu far autoritat per totas las jurisdiccions administrativas de l’estat francés qu’enebisson lo pòrt d’aquel vestit de banh, qu’en Occitània son Leucata en Narbonés; Mandatluec la Napola, Canas, Sant Laurenç de Var en Vencenc; e en Comtat de Niça, otra la capitala, aquel vestit de banh es estat enebit pels conselhs municipals de Sant Joan de Cap Ferrat, Bèuluec de Mar, Caup d’Alh e Menton.
 
Divèrses elegits franceses se son prononciats en favor d’enebir lo pòrt del burkini. Lo primièr ministre, Manuel Valls, assolidèt qu’aquel vestit de banh “es pas compatible amb las valors de la Republica [francesa]”. Tanben l’èx-president e candidat a la presidenciala, Nicolas Sarkozy, a criticat durament lo pòrt d’aquel vestit en tot assegurar que l’enebirà s’arriba al poder.

 
 

#France: Nous saluons la décision du Conseil d’Etat de suspendre l’interdiction du #burkinipic.twitter.com/fhL2JzHjVd

— UN Human Rights (@UNHumanRights) 30 d’agost de 2016

 

#Burkini: Gender equality can't be achieved by restricting individual freedoms including by policing what individual women choose to wear.

— UN Human Rights (@UNHumanRights) 30 d’agost de 2016

 

#Burkini: Dress codes disproportionately affect women & girls, clearly discriminating against them.

— UN Human Rights (@UNHumanRights) 30 d’agost de 2016

 

#Burkini: L’égalité de genres ne peut être obtenue en réglementant les vêtements que les femmes décident de porter.

— UN Human Rights (@UNHumanRights) 30 d’agost de 2016