“Lo drech al lotjament preval sul drech a la proprietat”, es atal que la justícia a donat, aqueste mes d’agost, rason als esqüataires del cinèma Royal de Montpelhièr. Sens apèl de la part dels proprietaris, los ocupants del Royal i pòdon restar, çò rapòrta France 3.
 
Barrat en genièr de 2015, los proprietaris d’aquel cinèma avián l’idèa de lo transformar en immòble d’apartaments, dins l’encastre d’un projècte immobilièr qu’intrava dins la renovacion de la carrièra de Bossairòlas, tot pròche de la plaça de la Comèdia, en plen centre de Monpelhièr. Mas per o poder far, lor caliá fòrabandir los ocupants del sit, e per aquela rason faguèron apèl a la justícia lo 2 d’agost passat.
 
La justícia respondèt una setmana pus tard. Aperaquí un trentenat de personas demòran sul sit, e d'unes i an quitament apausat lor boita de las letras e i recebon lors facturas. “Aquò es pas ni legal ni illegal”, çò afirman los jornalistas de France 3 que senhalan que, en avent pas los mejans de logar un apartament e en profechant d'aquel espaci de vida, los abitants plaidejan lo drech al lotjament.
 
 
Un sit tot plen de vida
 
En mai d’aquò, l’esqüat a tornat reviscolar lo pus vièlh ecran de Montpelhièr en tot venir un espaci alternatiu de cultura e de reflexion dobèrt a totes. I projèctan de filmes de contengut social e de documentaris... e quitament i an fach un concèrt de cant polifonic occitan en amassant dos centenats de personas.
 
En mai d’aquò, cèrcan que lo sit venga una residéncia d’artistas, vòlon organizar de rescontres amb de realizaires de filmes e tanben prepausar l’endrech per las assembladas generalas del movement Nuèch de Pè e per d’organizacions sindicalas.
 
Los vesins tanben desiran acompanhar la transformacion del luòc e plusors se son reünits amb los ocupants. De reünions que se tendràn fòrça sovent.
 
Tot lo programa de las activitats lo podètz trobar sus la pagina Facebook: Le Royal Occupé.