Lo grop d’hackers AntiSec, restacat a Anonymous e a Luzlsec, afirma qu’a capitat d’extraire d’informacions privadas tocant dotze milions d’usatgièrs d’Apple dempuèi un ordenador apertenent a un membre de l’FBI. Dins un comunicat, AntiSec ditz qu’a fach publics un milion d’aqueles dotze milions d’identificadors (unique device identifiers o UDID), sortits de dispositius iPhone e iPad en possession d’aquel agent de l’FBI.

L’UDID es un còde que presenta tot dispositiu mobil que siá de la marca Apple e que compren las informacions basicas sus l’usatgièr coma lo nom e l’adreiça, lo còde postal e lo numèro de telefòn, entre d’autras.
 
Dison, los hackers, que las donadas, las panèron de l’ordenador portable Dell d’un agent de l’FBI, en aprofechant una vulnerabilitat de Java, al mes de març passat. L’FBI a pas confirmat ni desmentit s’avián aqueles milions d’identificadors d’Apple ni s’èran estats panats.
 
Per AntiSec, s’agís d’una manièra de demostrar l’enòrme poder qu’a l’FBI sus l’identitat dels usatgièrs e qu’atempta contra la libertat personala: “Las gents son frustradas, sentisson que lo sistèma los manipula mai que jamai. Cal pas jamai mespresar lo poder de las gents frustradas”, çò dison dins lo comunicat, qu’acusa tanben Apple de configurar e conservar aquelas donadas, riscant d’èsser emplegadas per de tèrces.
 
Lo sit web The Next Web a creat un sistèma per verificar s’un còde UDID concret es dins la lista publicada per AntiSec.