Los escolans de seisena bilingüa de Bretanha an tres oras d’istòria-geografia en breton per setmana. Mas ongan dos collègis publics d’aquel país començan la rintrada sens professor d’istòria en breton. S’agís dels collègis l’Iroise a Brest e Kerallan a Plouzane, que dobrís ongan sa seccion bilingüa. Ça que la, l’ensenhaira existís, mas es estada mudada a l’Acadèmia de Versalhas, al costat de París, segon çò que publica Ouest France.
 
Dins la foncion publica, los ensenhaires de segon gra pòdon èsser titularizats dins tot l’estat francés, mas los parents dels escolans esperavan que sa certificacion de breton foguèsse prioritària. “La tardor passada, l’estat e la region signèron un acòrdi per desvolopar l’ensenhament del breton”, çò explica David Redouté, president de l’assoaciacion Div Yezh, de parents d’escolans en seccion bilingüa francés-breton. Aquela convencion prevei d’aumentar lo nombre d’ensenhants britofòns. Redouté precisa indignat a Ouest France que “los escolans bilingües an pas de patir d’errors grossièras del rectorat de Roazhon qu’a pas sabut conservar sos mejans, del temps qu’ongan lo ministèri de l’Educacion nacionala [vòl dire estatala] aviá mes en plaça un movement especific dels ensenhaires en lengas regionalas [vòl dire nacionalas]”
 
Div Yezh a mandat un corrèu de protestacion a la ministra francesa de l’educacion e uèi a 17h se tendrà un acamp de protèsta davant lo collègi l’Iroise a Brest.
 
Lo rectorat precisa que “dempuèi març passat” demandan lo retorn de la professora a l’Educacion Nacionala. Mas l’acadèmia de Versalhas sembla que s'i resistís, car manca de professors.
 
Lo provisor de la ciutat de l’Iroise Michel Favé a declarat qu’espèra “lo retorn de l’ensenhaira”; mentretant, “los escolans an totun de corses d’istòria, mas en francés, non pas en breton”.