9000 santlisians se preparan los dimenges 11 e 18 de setembre a causir 29 nòus conselhièrs municipals mentre que i a pas d’eleccions dins lo país. Aquestas municipalas anticipadas foguèron provocadas pel prefet perque lo cònsol PS, Jacques Tène, posquèt pas far adoptar lo sieu budget. La crisi foguèt primièr financièra e la Cramba Regionala deus Comptes de Tolosa diguèt que “lo deute es pas de sostenir par la comuna” en decembre de 2015. Se’n seguiguèt una crisi politica a l’interior de la majoritat socialista, abrandada per l’oposicion verda, occitanista e centrista menada per P. Lasseube e C. Renaux. La majoritat del consòl PS, J. Tène, s’espetèt a la prima passada amb la demission dels dos tèrces del conselh municipal d’aquela bastida gascona. Per sortir de l’androna, la paraula es donada al pòble ara.
 
Seràn tres listas presentas. Malgrat las temptativas del Front Nacional, que fa entre lo 30 e lo 40% dels vòtes a las eleccions, i aurà pas cap de lista d’extrèma dreta a las eleccions de setembre 2016. Trobèron pas pro de personas per montar una lista als uelhs de totes.  I a segur la lista del cònsol sortent, J. Tène, sostenguda pel PS, malgrat la situacion de quasi quincanèla de la comuna. Puèi i a doas autras listas d’oposicion al cònsol socialista que son puslèu atipicas. Avèm una lista Los Verds –MoDem, menada per Catarina Renaux (EELV) e amb en dusena posicion lo centrista e occitanista Patric Lasseube. Aquesta lista, ja presenta en 2014, faguèt lo 49,9% de las voses al segond torn de las municipals fàcia als 50,1% del PS. Mas la novetat veng de la lista Serge Deuilhé (dissident PS, sostengut pels Republicans). Aquel Deuilhé, primièr adjunt del cònsol socialista, se rebellèt e demissionèt a la prima e se torna ara presentar contra J. Tène que sosteniá i a pas gaire. Cerquèt donc l’ajuda dels Republicans locals (LR) per poder partir a las eleccions. Es aital qu’avèm una lista  amb d’ancians PS e de LR…
 
Avèm donc, darrièr las etiquetas, una vida politica locala complèxa e activa coma sovent en Occitània ont la politica es un espòrt nacional. Al delà de l’eleccion locala, Sant Lis es interessanta per l’occitanisme. D'efèit de 2001 a 2008, Patric Lasseube, en revendicant son occitanisme, apliquèt son programa. Aital, naissèt la primièra escòla bilingüa francés–occitan de l’ensenhament public de la Nauta Garona, se creèt un centre occitan de documentacion e comencèt una senhalizacion bilingüa amb l’occitan. Lo cònsol actual, J. Tène, après d’esitacions, confirmèt las orientacions presas e nos trobèm amb gaireben 150 dròlles que seguissen un ensenhament en occitan sus la comuna de Catinon e Jacotin.
 
Recentament, e per amor de l’accion de P. Lasseube, se cambièt los noms oficials de toponims importants de la comuna en integrant la forma occitana. Aital Bruno, Mengesèbes, La Souliguières, e Crabille venguèron Brunot / Brunaut, Mingecèbes /Minjacebas, La Souliguière / La Soriguèra e Crabille / Crabilha. De notar qu’aquò permetèt de corrigir cacografias coma Mengesèbes en francés. (veire sit de la comuna)
 
A aquestas eleccions lo movement Bastir de la Gasconha tolosana causisquèt de sostenir publicament la lista Renaux-Lasseube (EELV-Modèm)
 
 
 
Nicolau Rei Bèthvéder