Un cambiament politic es a arribar a Hong Kong. Un partit de uèch joves activistas que defendon l’independéncia de China an obtengut un sèti al Parlament après las eleccions de dimenge passat. Un dels uèch joves es Nathan Law, de 23 ans, que foguèt un dels caps de la Revolucion dels Parapluèjas qu’en 2014 bloquèt las carrièras de la vila en demandant un cambiament politic devèrs la democracia. D’aquel movement nasquèt lo partit Demosistō, que cinc meses après sa naissença a obtengut mai de 50 000 vòtes.
 
Demosistō demanda un referendum d’autodeterminacion dins dètz ans, qu’òm pòsca decidir l’avenir de la ciutat après 2047, quand seràn passats los 50 ans que China reprenguèt la sobeiranetat d’Hong Kong. Es alavetz qu’es previst que finisca lo modèl actual “un país, dos sistèmas”.
 
En mai d’aquò, un autre partit apelat Youngspiration, qu’a dos deputats al Parlament de la ciutat, defend de far un referendum en 2020, que sos resultats s'apliquen a partir de 2047.
 
 
D’eleccions fraudulosas
 
L’eleccion de dimenge passat a batut lo recòrd de participacion amb 2,2 milions de votants, çò es lo 58% del total. Mas, totun, s’agís d’una eleccion fradulosa, car la majoritat pròchinesa a 40 sètis assegurats suls 70 del Parlament d’Hong Kong, e dins la votacion s’elegís solament los autres 30.
 
Fins ara, lo Parlament d’Hong Kong èra dividit en dos grops, los pròchineses e los pandemocratas que, sens se voler separar de China, volián mai d’autonomia per la ciutat. Mas tre l’intrada dels independentistas se presenta una tresena alternativa, qu’es l’independéncia. En mai d’aquò, es lo primièr còp que dins l’eleccion populara an ganhat los pandemocratas e non pas los pròchineses.
 
Ça que la, lo govèrn de Beijing refusa categoricament l’alternativa independentista. Pendent la campanha electorala se destituiguèt cinc candidats per aver defendut publicament l’independéncia. Ara, l’enjòc dels joves independentistas del Parlament d’Hong Kong serà que se pòsca debatre sus aquel sicut dins l’agenda politica de la cambra.