Aperaquí 540 000 contenedors de mèrças son en nauta mar sens cap de destinacion, çò rapòrta Geopolítica.cat. La causa n'es que la companhiá maritima Hanjin Shipping, de la Corèa del Sud, s’es declarada en quincanèla e totes sos vaissèls son atrapats dins la mar. Los pòrts los daisson pas intrar, an paur que paguen pas, e los vaissèls devon esperar que la societat o sos creditors tròben una solucion. E mai se los pòrts los daissèsson intrar, o farián pas, car la societat cranh que los contenedors sián embarcats sul pic pels creditors.
 
A l’ora d’ara i a un total de 45 naviris dins los limbes sus tota la planeta amb de cargaments de tota sòrta. Sus cada vaissèl i entre 15 e 25 marins.
 
Es lo primièr còp dins l’istòria que se passa una situacion coma aquela. S’agís d’una quincanèla sense precedents e i a pas cap d’antecedent per far d’ipotèsis sus l’avenir. Segon los expèrts los batèls restaràn dins los limbes qualques setmanas o qualques meses. S’agís d’una catastròfa enòrma tanben per las entrepresas proprietàrias de las mèrças que son dins los contenedors. Setembre es un mes mai que mai actiu tocant al transpòrt de las mèrças en vaissèls, a causa de la granda quantitat de produches que van als Estats Units per preparar las crompas de Nadal.
 
 
Una estructura confusa
 
L’estructura de la companhiá Hanjin es un pauc confusa. Una partida dels naviris son de la societat mas tanben ne lòga d’autres, qu’ara son en nauta mar e que sos proprietaris los pòdon pas recuperar e corron lo risc qu’Hanjin Shipping pague pas lo loguièr.
 
La meteissa causa se passa amb los contenedors, que qualques unes son d’Hanjin mas d’autres son d’una aliança de cinc societats. E las societats proprietàrias de las mèrças que se tròban dins aqueles contenedors son milanta. Per exemple Geopolítica.cat mençona una societat d’electronica asiatica que manda sos produches als Estats Units.