La sonda especiala Juno de la NASA a mandat los primièrs imatges del pòl nòrd de Jupitèr, preses pendent lo primièr viatge orbital de la sonda a l'entorn de la planeta. Los imatges mòstran de tempèstas e una activitat meteorologica fins ara desconegudas dins lo Sistèma Solar.
 
“Lo pòl nòrd de Jupitèr retrai pas a res qu'ajam vist o imaginat”, çò diguèt Scott Bolton, principal cercaire de la còla de Juno. “Lo pòl es mai blau que las autras partidas de la planeta e s’i produtz fòrça mai de tempèstas […] la planeta pus granda del nòstre sistèma solar es cèrtament unica”, çò apondèt.
 
En mai d’aquò, lo JIRAM —sistèma infraroge de la sonda— a permés de detectar de ponches cauds als pòls nòrd e sud que s’èran pas jamai observats. Juno a tanplan  captat pel primièr còp l’auròra australa de Jupitèr.
 
Juno intrèt dins l’orbita de Júpiter lo 5 de julhet passat, après un viatge de gaireben cinc ans. Lo 27 d’agost finiguèt lo primièr viatge orbital e ne farà d’autres 36 abans de s'esclafar contra la planeta. La sonda Galileo virèt ja a l’entorn de l’orbita de Jupitèr mas aviá pas d'instruments per estudiar delà las nívols de l’atmosfèra.
 
 
Las tòcas de Juno
 
L’astronòm catalan Enric Marco explica dins son blòg deVilaweb que ta tòca principala de Juno es de comprene l’origina e l’evolucion de Jupitèr. “Amb l’ensems dels nòus instruments scientifics que pòrta”, çò ditz Marco, “Juno examinarà la possibla existéncia d’un nuclèu planetari solid, farà una mapa detalhada de l’intens camp magnetic de Jupitèr, mesurarà la quantitat d’aiga e d’ammoniac dins l’atmosfèra prigonda e observarà las auròras de la planeta. La mission nos permetrà tanben de far un pas de gigant dins la nòstra compreneson de cossí se forman las planetas gigantas e lo ròtle jogat per aqueles titans dins la formacion de la rèsta del Sistèma Solar. Jupitèr es lo nòstre primièr exemple d’una planeta giganta e, doncas, sa melhora coneissença poirà provesir d’informacions fondamentalas per comprene los sistèmas planetaris descobèrts a l’entorn d’autras estelas ont la preséncia de gigants gasoses es constanta”.